ïoh jamin ka Nongkhaïi Drok na ka ïing Bishar ba don jingpang HIV

Shillong, Risaw 3 : Ka ïing Bishar High Court jongka jylla ka la ai bah jamin ïa kawei ka Kynthei kaba shah pynngat ha ka kyndon Narcotics Drugs and Psychotropic Substances Act (NDPS Act) namar ba ka don ïa ka jingpang Human Immunodeficiency Virus (HIV).
ïa kane ka hukum la pynmih da u Justice W Diengdoh haba shong bishar ïa ka jingkyrpad. Ula ong ruh ba dei ban niew kyrpang ïa kum kane ka kam khnang ba kane ka nongpang HIV kan ïoh ïa ka jingsumar.
“Ka nongpan bah jamin ka dei kaba pang HIV khlem da kheiñ ïa ka jingai jingsumar jong ka Sorkar ka lah ban biang ne em kat kum kane ka jingpang, kane ka ïing Bishar ka sngew ba dei ban kheiñ kyrpang ïa kane ka briew ba kan ïoh ïa ka jingsumar ïa ka jingpang ba ka don ha ki jaka ba ka sngew ïahap” ong u Judge.
Haba pynmih ïa ka hukum, ka ïing Bishar kala phaidien ruh ba ha u snem 1991, ka ïing Bishar Supreme Court ka la ai jamin ïa uwei u briew, uba don ïa ka jingpang HIV.
ïa kane ka kynthei kaba la ïoh jamin, kala shah pynngat halor ka jingkynnoh ba ka don ha ka met jong ka, ïa bun u drok ba mut pynïaid ïew.Ka ïing Bishar ka la ong, ïa ka jamin lah ban ai hapoh ka kyndon 37 jong ka NDPS Act haba kdew ruh ïa ka Article 21 jong ka Riti Synshar ka Ri kaba kren ïa ka jingim bad jinglaitluid jong u briew ruh ka dei kaba kongsan. ïa kane ka briew la pyllait jamin hadien ka jingai ïa ka surety ba T. 1 lak.