Khliehriat, Nailar 06 : Ki dkhot jong ka Hynñiewtrep National Youth Movement East Jaiñtia Hills District lem bad ki pulit jong ka Phra mer (West Jaiñtia Hills District) hynnin ka miet ki la ioh bat ïa kawei ka kali sumo kaba don u registration number ML-11-0661 bad la lap ba kane ka kali ka la kit ïa ki mrad khlaw da ka jingthmu ban shalan beaiñ ïa ki mrad, ki dkhot jong ka seng ki la dawa na ki bor ka aiñ ba ki dei ban pynshitom ïa kiba don kti ha kane ka kam beaiñ kaba thmu ban pynduh jait ïa ki mrad khlaw.
Ha ka jingkhynra, la lap ba don uwei u shrieh huleng (Hoolock Gibbon), kawei ka shrieh Phayre leaf Monkey, ar tylli ki sim khlaw (Grey Langur), u wei u jait sim (great Indian Hornbill bad uwei u jait mrad ba ju tip kum u Otter, ïa kine ki mrad ka tnat pulit jong ka West Jaiñtia Hills District ka la aiti noh sha ka tnat Wildlife ban leh ïa kaba donkam.
Ki khubor pulit ki iathuh ba ïa katei ka kali la ñiah da u Kormola Bru, 24 snem kyrta uba dei na ka jylla Mizoram bad katei ka kali ka dei kaba dang wan na Mizoram bad thmu ban leit sha Guahati, la don ryngkat lang ruh uwei u nongbud uba la tip kyrteng kum u Micheal Bru, uba dei na jylla Mizoram hi.
Ka Hynñiewtrep National Youth Movement (HNYM) East Jaiñtia Hills District haka kyrwoh ba la phah da u President samla Commingsoon Dkhar kala dawa ban pynshitom tyngeh ïa kitei ki briew kiba donkti ha ka kam shalan beaiñ ïa ki mrad khlaw.
La ong ruh ba kitei ki jait mrad ki dei kiba la jan duh jait katkum ka kyndon jingïada ïa ki mrad khlaw, ka Wild life Protection Act 1972.
“Hadien ba la khynra ïa ka kali la lap ïa ki synduk ba thep ïa kitei ki mrad ha kaba utei u jait sim (Great Indian Hornbill) u dei uba hap hapoh ka Schedule 1 jong ka WPE Act, kitei ki mrad ki dei kiba la don ruh ha ka red list jong ka IUCN, kaba mut ba donkam ban pynneh ïa ki namar ki la jan duh jait” ong u kyrwoh na ka seng.
Kumjuh ruh, ka seng kala kyrpad jur na ka ophis ka Divisional Forest Officer Jaiñtia Hills Wildlife Division, Jowai ba kan pynlong ka jingtohkit kaba bniah bad ban pynshitom ïa kiba donkti ha kane ka kam namar kane ka long pyrshah ïa ka jingim ki mrad khlaw.
