Ha ryngkat ki pulit bad magistrate, la plie ïa ki tala ka toll plaza ba khang KSU

Khliehriat. Nailar 06: Watla ki Lama jong ka KSU ki dang kaweh ban pyni ïa ka dak ba ki dang ïai bteng ïa ka jingkhang tala ïa ka toll gate ha Lumshnong, ki bor synshar district jong ka East Jaiñtia Hills District mynta ka sngi saitjaiñ ha ka jingsynran lang ki pulit ki la leit ban plie noh ïa ki tala ba la Khang da ka khasi students union East Jaiñtia Hills District ba la khang naduh ka 28 tarik u naitung, ha kaba da ka hukum u Deputy Commissioner, u Abhilash Banarwal IAS, u Extra Assistant Comissioner, u bah S.Marwei u la plie ïa ki tala jong ka tei ka toll gate ha Lumshnong.
Ka jaka khrong khaja jong ka NHAI ha Lumshnong mynta ka la sdang biang ïaka kam ban lum khajna na ki kali, kata hadien ka jing leit khang tala ka seng.
Kum ban shu phai dien, ka nongrim ba ka seng ka ieng ka dei namar ka jingsniew palat ka surok national highway bad ka jingpynslem palat ka NHAI ban maramot ïa ka surok kumta ki la leit ban khang tala ïa katei ka jaka lum khajna jong ka NHAI.
Haba kren sha ki pathai khubor, ki nongtrei kiba trei ha katei ka toll plaza kiba dei ki trai jylla kiba na ka thaiñ Lumshnong, ki la kyntu jur ïa ka Khasi Students Union East Jaiñtia Hills District ba kan sngewbha ban pyrkhat lem ioh ba ki nongtrei khamtam ki briew jong ka thaiñ kin duh tulop ki la ong ruh “Na ka liang ki nongtrei trai jylla, ngi kyrshan beit ïa kane ka jingleh ka KSU, ngi lah ïohi hi da la ki jong ki khmat ba ka surok ka la sniew naduh Malidor shaduh Tuber, tangba ngi kwah ban pynsngew sha ka KSU ba ngi kum ki nongtrei hangne ngi don haduh hynriewphew ngut bad ngi la ioh khubor na u Manager jong kane ka Toll Plaza ba lada ym don ka jinglum khajna kaba man la ka sngi, kin nym lah ban ai tulop ïa ngi, kumta nga kyrpad ïa ka seng ba kan sngewbha ban pyrkhat lem ïa ngi namar bun kiba kyrshan ïa ka iïng ka sem da kaba bam tulop na ka NHAI na kane ka Toll gate”
Ha kajuh ka por, ki la kyrpad jur ïa ka KSU-East Jaiñtia Hills District ba kan sngewbha ban ïakren lem bad ki nongpyniaid jong ka Toll Gate ha kaba ïadei bad ka tulop jong ki nongtrei, khnang ba kin nym duh tulop.
Naduh ba la pynjari da ka hukum 144CrPC ha Lumshnong, hajan ka Toll Plaza, ki bor pulit ki la shim khia ban pahara ïa katei ka jaka bad ban peitngor ruh ban pynneh pynsah ïa ka shongsuk shong shngaiñ ha ka thaiñ, kumjuh ruh ban peit ngor halor ki jingmana kumba la bthah da ki bor synshar district jong ka East Jaiñtia Hills District.