Inter District Cricket Tournament: Mynta yn ïaknieh namlahduh ka EGH-DCA & Tura DCA

Shillong, Nailur 29: Wat hadien ba hap ban ïada ïa ka ron kaba duna, kata tang 79 ron, kam shym la long ka jingeh na bynta ka East Garo Hills District Cricket Association ha kaba ka la pynliem noh ïa ka Shillong Cricket Association A da 18 ron ha ka jingïakhun semi final kaba ar jong ka lympung jong ka Meghalaya Cricket Association’s U-19 Boys Inter District Cricket Tournament kaba la long ha Salpara, Mendipathar, hynne ka Sngi Thohdieng.
Kane kamut ba ka jingïaknieh namlahduh kan long hapdeng ki kynhun jong ka Garo Hills kaba la pynkhreh mynta ka sngi ha kaba ka EGH kan sa aireng pyrshah ïa ka Tura DCA, kaba la jop ha ka semifinal kaba nyngkong pyrshah ïa ka West Jaintia Hills DCA hynnin ka Sngi Palei.
U Ayushman Rabha u la long u rangkawangbol ba seisohtam lyngba ki 8 bad khur haduh 4 bad ailad tang 7 ron ha kaba ka SCA-A ka la lah ban tehlakam ïa ka EGH ban kamai bun ron, da kaba pynkhyllem ïa baroh tang 79 ron na ki 40 over bala buh.
Hynrei watla kata ruh na ka liang jong u Lensbirth N Marak u la ïoh ban ïarap 35 ron na bynta ka kynhun, kaba la pynïoh mynsiem ïa ka EGH ban lehbha ha ka bowling.
Kiwei pat ki rangkawangbol jong ka Shillong kiba la lah ban lehkai bha ki kynthup ïa u Charm Marbaniang (3/12 naki 7 over) bad u Angkit Tamang (2/12 naki 4.2 overs). Ryngkat bad u Ayushman, kine ki lai ngut ki nongkawangbol, bad ruh u wicketkeeper bad ki fielder ki la lah ban pyndep ïala ka jong ka bynta, ban tehlakam ïa ka East Garo Hills na ka 45/1 shuwa ban hap u wicket u ba ar sha ka 79/10 da kaba shah pynhap haduh 9 wicket bad kamai tang 34 ron.
Dei tang u Lensbirth, u rangtied u ba la ïoh ban kynjoh sha ka phew ron na bynta ka EGH, bad u dei u rangïalehkai ba ar ban kamai bun ron tam ha kane ka Tournament da 154 ron.
Ki 35 ron ki jong u ki la long shisha ka jingïarap ha kaba ka SCA-A ka la shem jingeh ha batting kumba long ka EGH. Kumba la long ha ka inning kaba hashwa, ki la don lai ngut ki rangkawangbol kiba la ïoh ban khur jan mar katjuh ki wicket hapdeng jong ki- u Bilgrak G Sangma (3/7 naki 6.1 overs), u ba la pynpaw ba ka long kaba jwat ban ïoh kamai ron na ki bol kiba u kawang, u Jeristho R Marak (3/9 naki 4 over) bad u Gulgul Sangma (2/20 naki 8 over). Ki fielder ki la pyndep ïa ka bynta kaba khraw ha kane ka jingïakhun knockout kynthup ruh ïa u Lensbirth u ba la don bynta ban pynhap ïa arngut lyngba ka run out.
Ha kaba kut, dei tang u Angkit u ba la ïoh ban kamai 12 ron, kaba dei ka ron kaba hehduh napdeng ki rangtied ka SCA-A, bad kumba ka paw, dei ki rangkawangbol kiba la seisoh ha kane ka jingïakhun.
Ka SCA-A ka la shah pynhap baroh shiphew ngut tang hadien ba kynjoh sha ka 61 naki 23.1 over, kaba mut ba ka EGH kan sa ïoh ban aireng pyrshah ïa kaTura DCA ha ka final ka ban long mynta ka sngi. Kine baroh ar kynhun ki la dep ban ïakynduh ha ka Group stage, ha kaba ka EGH ka la jop da 12-ron ha ka jingïalehkai kaba la shah pynthut ha u slap. La ïoh jingtip ruh ba ka lah ban don ka jinghap slap ha Mendipathar mynta ka sngi kaba dei ka jaka ban sa pynlong ïa ka final, hynrei kyrmen ba ka por ban sa pynïakhun kan ailad ïa ka jingïakhun haduh kaba kut.