Ingkhong kawei ka ïing ha shnong Kharew

Mawkyrwat, ‘Naiwieng 22: Kawei ka jingjia kaba la jia ha kine ki khyndiat sngi ha kaba kawei ka ïing kaba don ha ka shnong Kharew kaba hapoh hapoh jong ka South West Khasi Hills District ka la kem ding bad ingkhong lut naduh ki tiar ki tiar.
Katkum ka tyllong khubor ba la ïoh lum la ong ba kane ka jingjia ka la jia ha ka 20 tarik u ‘Naiwieng, 2022 kaba dei ha ka Sngi U Blei kumba ha ki por 8 baje ei ei. “Ka ïing kaba la pluh ha katei ka tarik ka dei ka ïing ba shong ba sah ka kong Handalin Lyngkhoi bad u bah Krostar Mawdoh ha ryngkat ki 3 ngut ki khun bad baroh kine ki lait na ka jingmynsaw”, ong ka tyllong khubor.
Kumta halor kane ka jingjia, ka National People’s Party (NPP) jong ka Mawkyrwat Block ha ka 21 tarik u ‘Naiwieng, 2022 da ka mynsiem jong ka jingsngewkhia ki la leit ban jngoh ha ryngkat ka jingaimynsiem na ka bynta katei ka longïing. Ha ka jingleit jngoh jong ki dkhot ka NPP ki la lap ba katei ka ïing ka la ing lut khoit bad ym shym la ïoh shuh don shuh wat ki tiar ki tar hynrei donbok ba ha kane ka jingjia ym shym la don mano mano ba mynsaw.
Shuh shuh la ïathuh ruh ba ki kmie ki kpa kim shym la don satia ha ka por ba jia pluh ka ïing jong ki hynrei ki ïa don tang ki lai ngut ki khun kiba kynthup ïa u hynmen u Jopborlin Lyngkhoi ba 13 snem, u Nashafy Lyngkhoi ba 7 snem bad u Mebapyntngen Lyngkhoi ba 1 snem 7 bnai. “Ynda ka ding ka la klang haba u hynmen um lah shuh ban tem ïa ka ding u la shu ïalam noh ïa ki para sha kawei na ki jaka ba kham pajih khnang ban lait ban ka jingmynsaw”, ong ka khubor.
Namarkata, ka National People’s Party (NPP) jong ka Mawkyrwat Block da ka mynsiem jong ka jingsngewsynei bad sngewkhia halor kane ka jingjia ka la leit ban noh katto katne ki jingïarap ïa katei ka longïing kaba la duh noh baroh khoit ïa ki jingdon jingem.
Ha kane ka jingleit jngoh bad noh jingïarap la ïadonlang naduh u bah Lamphrang Lyngkhoi, bah Estarlin Kharsyiemiong, bah Storing Lyngkhoi, bah Teacher Thongni, kong Diliance Lyngdoh ba kiwei kiwei de.