Nongstoiñ, Nailur 7: Ki nonghikai kiba dei ki nongsaiñ dur ïa ka lawei ki khynnah bad ki long ruh kum ki kmie ki kpa kiba ar ha ki shnong ki thaw bad ha ka ri hi baroh kawei, hynrei naduh ba ki la shah pynduh kam jubor ha ka sorkar, ki la im kordit shisha bad hap ban trud dieng trud maw ban ioh la ka bam.
Ha kine ki sngi la ïoh ban ïakren bad u bah D.Lyngkhoi uwei na ki nonghikai Government L.P skul, u ba la shah weng kam ha kane ka sorkar MDA ryngkat ki hynriew phew san ngut kiwei pat, ha kaba u la ong ba ka sorkar MDA ka la weng kam ïa kitei ki hynriew phew san ngut ki nonghikai da kaba ai ïa ki daw ki bym shongnia bad ki bym don nongrim.
Nalor kata ka sorkar MDA ka la daiñ kuna ruh sa sanphew hajar uwei uwei u nonghikai, da kaba phah da ki notis bad bthah ba ki dei ban leit siew ha uwei u ophisar u ba ka sorkar ka la bynshet ha u ba un lum ïa katei ka kuna.
U bah Lyngkhoi u la ong ruh ba haduh mynta ym pat don wat uwei ruh u nonghikai u ba la leit ban siew ïa katei ka kuna. U tip shai kdar ba kin ym leit siew namar ki la rai kut ba lada ka sorkar kan phah kem, kin leit beit bad kin ïalam bad khun bad kti ban sah lang ha byndi bad kan kham suk ruh artad lada shong byndi, namar ka sorkar ka hap ban bsa ei ïa ki.
U la kren kutlad ruh ba ha kiba kum kine ki sngi ba ka kamai kajih ka ka hiar, ka bylla ka sngi kam don shuh, ki iew ki hat ki la shu khang sah ka rep ka riang ka la syrtok ka la bha hi ba ka sorkar kan shu set byndi noh ïa ki. U la ong ba ki don shibun ki nonghikai kiba wat tang ka kper ka phrah ruh kim don lait noh ka nongrim jong ka ïing ba ki shong. Kumta ban ong ha ka pisa lei lei ka long kaba da eh shisha, namar wat ïa ka tulop ka jong ki ha ki snem ba kim pat shah weng kam ruh ka sorkar kam pat siew dep.
U bah Lyngkhoi u la ong ba lada ka sorkar ka khñiot beiñ ïa ki haduh katne ruh, kan sa poi ka por ba na ka shuki ba ki shnong ki hap ban hiar sha ka lyngknot ne shong ha madan lada ki paitbah ki la bitar.
