Im jynjar ki paidbah ka Nongstoiñ Constituency hadien ka elekshon 2018, ong u pulit shongthait

Nongstoiñ, Risaw, 11: Ka dei ka sien ba nyngkong ha ka history jong ka United Democratic Party ha Nongstoiñ constituency, ba wat la ka election ka dang shim por sa kumba saw bnai tam, hynrei da ki spah ngut ki longkmie kiba dei na kiwei pat ki party kum na ka HSPDP, NPP bad Congress ki la wan ban pynïasoh sha ka UDP mynta ka sngi hatmajai ka 11 tarik Risaw. Ka sur na ki nongkyrshan hi ka long ba u soh u la nang ih bad kyrmen skhem ruh ba un dang thiang ngai ha ka risol elekshon MLA 2023.
Lah ban pynkynmaw ba dang ha u bnai ba la dep, ki nongïalam jong ka UDP ki la pynlong ka jingïakynduh lang bad ki la rai ban pynïeng ïa u bah Pullstar Nongsiej kum u kyrtong u ban ïa iareng ha ka election ban wan kaban long ha u 2023. Kaba phylla ka long ba naduh ba ki paitbah ki la bna wer wer ba u bah Pullstar Nongsiej u ba dei u para ar kmie jong u bah L.G.Nongsiej MDC barim ka Nongstoiñ, ki paitbah ki la ïakhih khohreh bad phai khmat sha ka UDP wat la kim pat ithuh satia ïa u kyrtong.
Dei tad hadien ba ka party ka la jied ïa u kum u President jong ka Nongstoiñ constituency bad ki la pynthikna ba un ïa aireng ha ka election ban wan, kumta ki longkmie bad ki paitbah na man la ki shnong bad ki jaka hapoh ka constituency, ki la ïa kmen bad ki la leit ban rung syndon sha ka party na ka bynta ban ai ka jingkyrshan ba pura bad ban trei shitom ban pynpoi sha ka thong.
Hynne ka sngi ki longkmie ki la leit ban pynïasoh sha ka party bad ki la jied ïa ki nongkitkam jong ka Womens wing Nongstoiñ Circle bad la pynlong ïa ka jingïalang mynta ka sngi ha MECOFED hall New Nongstoiñ, na ka bynta ban pynskhem ïa ki bad ban pdiang burom ïa ki ba la wan ban pynïasoh sha ka party.
Shuwa ban pynskhem ïa ki nongkitkam la pynlong ïa ka jingïalang ha kaba la pynïaid da u bah Bring Kharbani President ka UDP West Khasi Hills District. Na ka liang u bah Denes Parïong u pulit ophisar ba la shong thait, haba ai jingkren ha kane ka sngi u la ong ba ha shuwa u snem 2018 ki paitbah jong ka Nongstoiñ constituency kumjuh ruh ha West Khasi Hills District ki im suk im saiñ ka kami kajih ka kiew sted, ka ïoh ka kot ka biang ki ophisar sorkar kim ju shah pyndik hano hano.
Hynrei, kaba sngewsih ka long ba naduh u snem 2018 haduh mynta, ki paitbah hapoh ka District bad ha Nongstoiñ constituency, ki ïakynduh shibun ki jingeh khamtam ki samla ki don hapdeng ka jinglynga mynsiem ka bym lah ban bati naduh ka ioh kam ioh jam bad kiwei kiwei kaba la jur haduh katta katta.
U bah Pullstar Nongiej kyrtong jong ka party haba ai jingkren, u la ong ba ka jingwan pynïasoh jong ki longkmie kum ki nongkyrshan jong ka party, ka la nang ai mynsiem shuh shuh ïa ka party ha ki liang baroh. U la ong ba ha ki snem ba mynshuwa ka UDP ka burom ïa u (L) Maieit Hopingstone, namar u dei u riew khraw jong ka Jaitbynriew bad kam pat kwah eh ban pynïaleh election da ki kyrtong kiba khlaiñ, hynrei ka ju ïatreilang na ka bynta ban ai jingkyrshan bad ban pynjop ïa u.
U la ong ba ha kane ka kynti pat namar ba ki paitbah ki la mad shibun ki jingeh na ka daw jong ka jingshah ïalam ha ki National Party, ka UDP kam banse ban pynibor noh, khnang ban lait na ki National Party bad ba kin ym ïoh lad shuh ban lehmon kumba ka long ha kane ka kynti ba mynta.
Ki nongkitkam jong ka UDP Womens wing Nongstoiñ Circle ki long President kong A.Kharsyntiew, Secretary kong Aikmenhun Syiem Joint secretary kong Nabaker Nongsiej, kong E.Marshra bad Kong P.Lyngdoh, Treasurer kong C.Nongsiej, Organier kong kong W.Nongsiej, kong P.Dkhar, Kong M.Lyngdoh, kong S,Syiemlieh, kong B.Syiemïong, kong A.Syiem, kong kong Olmeba Nongrang bad kong Medalin Lyngdoh.