Shillong, Naiwieng, 19: Kum shi bynta ban khring ïa kiwei ki samla pule na kiwei ki ri ka thaiñ Asia, ka skulbah North Eastern Hills University (NEHU) ha ka jingïatreilang bad ka Ministry of External Affairs (MEA) ka Sorkar Pdeng kan pynlong da ka tamasa ‘ASEAN Musical Festival’ ha ka 22 tarik mynta u bnai ha NEHU Campus Shillong.
Haba kren sha ki lad pathai khubor u Prof. D. K Nayak u la ong ba la pynlong ïa kane ka tamsa ïatem ïa put na ka bynta ban pynkhlaiñ shuh shuh ka jingïadei hapdeng ki samla pule ka jylla Meghalaya, ka thaiñ Lam Mihngi (North East) bad kiwei ki samla ba nabar ka ri India khamtam na ka thaiñ Asia.
U Prof. Nayak u la ong ba ka long ka jingsngew sarong ba ka Ministry of Home Affairs (MHA) ka jied ïa ka skulbah NEHI Shillong ban pynlong ïa kane ka tamasa ASEAN Musical Festival ka ban dei ruh kum shi bynta ban ïakynduh lang ki nongmihkhmat ka Association of Southeast Asian Nations (ASEAN) ban ïathir kumno ban nang pynjanai shuh shuh ka jingïadei hapdeng ka ri India khamtam ka thaiñ Lam Mihngi bad ki ri kiba don ha ka thup ASEAN.
“Kum kine ki jait prokram kin ïarap ban khring ïa kiwei ki samla ki ri ba hab ha ka thup ASEAN ban wan pule hapoh kane ka skulbah NEHU ban don ruh ka jingïasam markylliang halor ki lad jingtip tynrai jong ki ri lajong” la ong u Prof. Nayak.
U Prof. Nayak u la ïathuh ba ha kane ka tamasa ‘ASEAN Musical Festival’ kin don lai tylli ki kynhun tem kiba napoh ka ri Indonesia, Singapore bad Myanmar ki ban wan tem lang bad ka kynhun tem napoh ka jylla kata ka Colour.
U la ïathuh ha kane ka sngi kan don ruh ka jingïatai halor kumno ban kyntiew ïa ka jingïadei hapdeng hapdeng ka ri India khamtam ka thaiñ Lammihngi bad kiwei ki ri ba don ha ka thup ASEAN bad kumno ban ïasam markylliang ïa ka jingnang jingstad tynrai bad kumno ban kyntiew ïa ka pule puthi.
Shuh shuh u la ïathuh ba ha kane ka sngi kin don ruh ki Myntri Sorkar Pdeng bad Sorkar Jylla bad ki riew shemphang ki ban ai jingkren halor ka jingmyntoi ban ïasyllok bad ki ri bapher bapher khamtam kiba don hapoh ka thup ASEAN.
