ïatrei lang u Conrad bad Rio ban pynïatylli ïa ka NDA ha kane ka thaiñ ha ka election MP Lok Sabha

Shillong, Lber 25: Ki artylli ki seng saiñ pyrthei ka thaiñ Shatei Lam Mihngi-ka National People’s Party (NPP) bad ka National Democratic Progressive Party (NDPP) ha ka sngi Nyngkong ki la ïasnohkti lang hapoh ka jylla Nagaland ban phah ïa ka khubor sha ki Liang Pyrshah ïa ka jingïatylli ka kynhun synrop National Democratic Alliance (NDA) ha kane ka ilekshon Lok Sabha ban wan.
U National President ka NPP bad Myntri Rangbah ka Jylla Conrad K Sangma ula ïakynduh ha ka sngi Nyngkong ïa u Myntri Rangbah ka Nagalang Neiphiu Rio, ban tyrwa ïa ka jingkyrshan ïa ka NDPP ha kane ka ilekshon Lok Sabha, ka ban long ha ka 19 tarik ïaïong.
Ka BJP kala rai ban ym sei kyrtong satia ha Nagaland bad Meghalaya ban ai ka jingkyrshan ïa la ki jong ki paralok ba ïatreilang ha ka NDA. Ha Kohima, Nagaland ka la rai ban kyrshan ïa kyrtong ka NDPP bad ha Tura-Shillong Lok Sabha seat kan kyrshan ïa ki kyrtong ka NPP.
Namar kane, ka NPP ruh ka la budlang ïa ka sienjam jong ka BJP da kaba rai ban nym sei kyrtong ban ïakhun ha Nagaland.
Haba ïakren bad ki lad pathai khubor na ka liang u President jong ka NPP bad u Myntri Rangbah ka jylla Meghlaya u Conrad K Sangma ha Kohima u la ong, “Ka State Committee jong ngi (NPP) ha Nagaland ka la ïakynduh hynne ka sngi bad ka la rai ban kyrshan ïa u kyrtong ka NDPP bad ruh ban ai ka jingkyrshan kum ka mynsiem shiparalok hapoh ka NDA.”
Na ka liang jong u la ong ba baroh ki paralok ha ka NDA kila ïatylli kawei ha kaban kyrshan kawei ïa kawei pat kum ka mynsiem shi paralok ba ïatreilang ha ka NDA.
U President ka NPP u la bynrap ruh da kaba ong, “Kumba phi tip, ki paralok ha ka NDA ki la pynpaw ïa kajuh ka jingkyrshan ïa ki seng saiñ pyrthei bapher bapher jong ka NDA kiba la buh ïa ki kyrtong ha ki konstituensi bapher bapher ka thaiñ Shatei Lam Mihngi. Kum ka nuksa, ki paralok ka NDA kila kyrshan ïa ki kyrtong ka NPP ha Meghalaya, ha Arunachal Pradesh ki paralok ka NDA kila kyrshan ïa ki kyrtong ka BJP bad ha Outer Manipur seat ngin ai ka jingkyrshan ïa kyrtong ka NPF.”
Lah ban pynkynmaw ba ka NPP ka dei ka party kaba don haduh 5 ngut ki MLA ha Nagaland, kaba tam ïa ka Liang Pyrshah Nagaland People’s Front kaba don 2 ngut ki MLA bad ka Congress-1.
Ha kane ka jingkyrshan ka NPP ha ki 5 konstituensi, ka BJP kaba don 12 ngut ki MLA bad ka NDPP kaba don 25 ngut ki MLA ha ka ïingdorbar kaba don 60 ngut ki MLA, ka dei kaba la khmih lypa kum ka jingjop ïa ka kynhun synrop wat hashwa ban sdang ka jingïakhun.