Shillong, Naiwieng 08: U Chairperson jong ka Meghalaya Human Rights Commission (MHRC) u Justice T Vaiphei ha ka sngi Thohdieng u la leit ban ïakynduh ïa u Lat ka jylla u CH Vijayashankar ha Raj Bhavan.
Ha kane ka jingïakynduh, na ka liang jong u Lat ka jylla bad u Chairperson ka MHRC ki la ïasyllok ïa kiba bun ki kam ba ïadei bad ki hok longbriew manbriew kiba ktah ïa ka jylla baroh kawei, bad ka jingïakren ka la long ruh kyrpang halor kumno ban ïada ïa ka hok jong ki kynhun kiba tlot bad ban pynthikna ba kin ïoh ïa baroh ki hok jong ki.
Na ka liang u Chairperson u la batai lyngkot ruh ïa u Lat ka jylla halor ki kam ka commission kiba la leh dangshen, kumjuh ruh ïa ki sienjam ba la shim ban khmih ïa ki hok longbriew manbriew hapoh ka jylla Meghalaya.
Halor kane na ka liang u Lat ka jylla u la ïaroh ïa ki kam ba la leh da ka Meghalaya Human Rights Commission ban pynneh ïa ka kyrdan jong ka longbriew manbriew bad ban ïada ïa ki hok jong ki nongshong shnong.
Na ka liang u Lat u la pynthikna ïa ki jingkyrshan ba pura jong u ïa u Chairperson ban pynkhlaiñ ïa ki kam jong ka Commission ban pynthikna ïa ka bha ka miat jong ki nongshong shnong jong ka jylla.
