Shillong Nailar, 05: Ka North-Eastern Hill University (NEHU) mynta ka sngi Thohdieng, ka la ïasoi ïa ka ka soskular ne ka Memorandum of Understanding (MoU) bad ka Indian Institute of Technology Guwahati (IIT Guwahati) ban ïatreilang ha ka ban kyntiew ïa ka jingleh Research ne jingwad bniah ha kaba ïadei bad ka Nanotechnology.
Kane ka ka MoU ka dei kaba la ïasoi da ka jingthmu ban kyntiew ïa ka kam Research ha ka Nanotechnology, ban pyndonkam ïa ki Nanoelectronics, Semiconductor Devices, Nanophotonics bad Nanofabrication.
Kan don ruh ka jingpynlong prokram mar kylliang hapdeng ki nonghikai, ki scholar bad ki samla pule khnang ba kin ïoh ïa ka jingpyntbit ha katei ka bynta da ka jingthmu ban kyntiew ha kaba ïadei bad ka juk stad saïañ hapdeng ka NEHU bad IIT, Guwahati lyngba ka jingïatreilang.
U Prof Prabha Shankar Shukla, Vice-Chancellor ka NEHU, ula pynpaw ïa ka jingsngewtynnad halor katei ka jingïatreilang bad ula ong ba kane ka jingïasoi Soskular ka dei ka jingjam sha uwei pat u mawmer ha ka lynti ïaid jong ka NEHU na ka bynta ban pynjanai ha kaba ïadei bad ka kam wad bniah.
“Ka jingïatreilang ka jong ngi bad ka IIT Guwahati kan wanrah ïa ka jingïadei kaba ïajan khamtam ha ka ban pynlong ïa ki jingwad bniah ha kaba ïa dei bad ka Nanotechnology bad ban plie ïa ka jingkhang na ka bynta kiwei pat ki lad na ka bynta ki samla pule bad ki nonghikai” ong u VC ka NEHU.
Kawei na ki bynta ba kongsan jongka MoU kadei ban pynlong ïa ki Short- Term Course bad ki Training Program lyngba ka INUP-i2i program bad ïa kine ki course yn pynwandur ha ka ban kyntiew ïa ka sap bad jingshemphang ki nonghikai bad samla pule bad ban plie lad ïa ki ba kin wad bniah ïa ki bynta kiba ïadei bad ki Nanotechnology.
Ka NEHU bad IIT Guwahati kin ïatreilang ruh ha ka ban pynlong ïa ki workshop, seminar bad ki short-term awareness program bad kine ki prokram kin long kum ki rynsan ban pynsaphriang ïa ki jingnang jingtip bapher.
Ka Department of Nanotechnology jongka NEHU kan plie ïa ka bynta kaba kongsan ha ka ban ïatreilang hapdeng kine ki ar tylli ki jaka pule bad ka skulbah NEHU ka la dep ruh ban buh ïa ka Center ban pule aka M.Tech and Ph.D. ha ka Nanotechnology.
Ka M.Tech program ha ka Nanotechnology hapoh NEHU ka long ban plie lad ïa ki samla pule kiba don ïa ki jingshemphang ha ka laiñ Engineering kum ka Nanotechnology, Biochemical Engineering, Biomedical Engineering, Biotechnology, Chemical Engineering, Electronics Engineering, Energy Engineering, Electrical Engineering, Mechanical Engineering, Metallurgical Engineering bad kumjuh bad kito kiba dei ki M.Sc. ha ka Nanoscience, Physics, Chemistry, Material Science, Electronics, Biotechnology, Biochemistry.
Ka Department of Nanotechnology ka dei kaba la don ruh ïa ki tiar ki tar na ka bynta ban ai jinghikai ïa ki samla pule bad ban leh ïa ka Research bad kane ka tnad ka pynthikna ba kan ïaid ryngkat bad kane ka juk kaba mynta ha kaba ïadei bad ka nanotechnology ban pynthikna ba ki samla pule bad ki nongleh Researchers kin long beit hakhmat.
