Shillong, Nailur 14: Kan long ka burom kaba khraw ha kaba u Myntri kam jngohkai ka jylla Bah Paul Lyngdoh, u la ïakynduh ïa ka Simona-Mirela Miculescu, President ka UNESCO General Conference kaba 42 bad ka Ambassador ka Romania, ban ïasaid na ka bynta ban ithuh ïa ka Jingkieng Jri (Living Root Bridges) kum ka pateng pyrthei jong ka UNESCO World Heritage.
La ong ba ha kane ka jingïakynduh la donlang ruh u Ambassador ka India bad u Permanent Representative sha ka UNESCO.
Lah ban ong ba u Bah Paul u la ban jur ïa ka jingdonkam ban ïoh ïa ka jingkyrshan ban nang pynïaid shakhmat ïa ki jingkieng jri, kiba don mynta ha ka thup ban ïoh jingithuh na ka UNESCO. Ka jingïakren ka la mih ruh halor ki jingïatreilang ban buh thup ha ki kor digital bad kiwei kiwei.
Ka Miculescu ka la pynpaw ïa ka jingai khublei halor kane ka jingïalang ha ka X (Twitter mynshwa), da kaba ong, “Nga sngewkmen ban pdiang sngewbha ïa ka kynhun na India ba la ïalam da u Bah Paul Lyngdoh, Myntri ka Tnad Social Welfare, Tourism, Arts, Cultre and Textile jong ka Jylla Meghalaya, kaba tip kum ka Ri ki Lyoh, kaba hab hapoh kawei na ki jaka ba riewspah tam ha ka jingdon ka spah mariang hapoh ka pyrthei. Ka jingïakynduh ka long kaba sngewtynnad”.
