Ïaroh u Myntri ka Sorkar Pdeng ïa ka Early Childhood Development Mission ha Meghalaya

Shillong, Jymmang, 25: U Myntri ka Sorkar Pdeng uba peit ïa ka Ministry of Education, Skill Development and Entrepreneurship u Dharmendra Pradhan u la ïaroh ïa ka jingpyntyllun shakhmat jong ka Sorkar Jylla ïa ka Early Childhood Development Mission bad ïa ka Entre-preneurship Ecosystem.
U Pradhan u la pynpaw ïa kane ha ka jingïalang kaba la ïadonlang u Myntri Rangbah ka jylla u Conrad Sangma, u Myntri ka tnad Pule Puthi u Bah Lahkmen Rymbui bad kiwei kiwei ïa kaba la pynlong ha skulbah NEHU ha ka 21 tarik mynta u bnai.
Ki mat ba la ïatai ha kane ka jingïalang ki long ban sngewthuh ïa ka jinglong ka jaka bad ban thew ïa ka jingïaid shaphrang ka Sorkar Meghalaya ha ka jingheh jingsan ki khyllung, ka rukom hikai, ka jingsengkam lajong bad ka lad ïohkam ïohjam.
La pyni ïa ka jingbatai ba bniah kaba pynpaw ïa ka jingïaid shaphrang jong ki kam pynroi bapher bapher, ki jingeh ba ka Sorkar ka ïakynduh bad ki jingjop jong ka.
Katto katne ki symboh ba la pyni ki kynthup ïa ka jingïaid ki kam hapoh ka Early Childhood Mission, ki jingpynbha ban ïoh pule kham shalor, ki jinghikai pyntbit, ka jingsengkam lajong bad ki program jong ka PRIME.
U Myntri Rangbah ka Jylla u la pyntip sha u Myntri ka Sorkar Pdeng halor ka prokram ba dang shu plie paidbah dang shen kaba la tip kum ka ‘Meghalayan Grassroots Music Projects’ bad kiwei kiwei ki prokram ba la leh ban kyntiew ïa ki nongthai) bad nongshna kti ha ka jylla.
U Pradhan u la ai jingmut ruh ïa ka Jylla Meghalaya ban kynthup lang ïa ka Early Childhood Mission da kaba pynïasnoh lang bad ka tnad ka Pule Puthi bad ka tnad Social Welfare.
Shuh shuh, u la ai mynsiem ruh ïa ki samla ka Jylla Meghalaya ba kin shah hikai halor ki kam ba ïadei bad ka jingpynrung kyrteng ban khanglad ïa kiwei ban die ïa ki jingshem ne jinglap jong ki bad ka la bthah ruh ïa ka skulbah NEHU ban bad pynmih ïa ki jingpule halor ka jinghikai pyntbit bad ki jingkhanglad ïa kiwei ban die ïa ki jingshem ne jinglap jong ki.
U la ai jingmut ruh ba yn jied ïa ka NEHU ba kan long kum ka bor ban khmih ïa baroh ki jaka pule ka Sorkar Pdeng ha ka jylla.
U la ai jingmut ruh ba ki skulbah ha ka jylla Meghalaya ki dei ban sdang noh ïa ka National Institute Ranking Framework (NIRF). Nalor kata, u la ai mynsiem ïa ki khynnah pule ha ka jylla ba kin pyrshang ban rep ban riang ha iing ha sem bad ha skul ruh.
U la ai jingmut ba ki khynnah pule ka jylla ba ki dei ban pynrung kyrteng ïalade bad ka Student Registration System jong ka Sorkar India ka ban sa sdang shen.
U Pradhan u la pynpaw ïa ka jingsngewtynnad halor ka jingpyndonkam ïa ki buit Technology bad u la ai jingmut ba ka jylla ka dei ban wad ïa ki lynti kiba lah ban long ban pynrung ïa ka Drone Technology haka rep ka riang ka ban ai jingshakri ha kaba pynpoi ïa ki tiar ki tar na kawei ka jaka sha kawei pat.