Ïaroh u Myntri ka Koit ka Khiah ïa ka jinglen lade ki bor pynïaid ban shakri ïa ki paidbah

Mairang, Risaw 9: Ka Holy Cross Health Centre, Mairang ha ka sngi saitjaiñ jong ka taiew, ka la ïoh ban rakhe ïa u mawmer jong ka jingdap 25 snem jong ka ha ka jingshakri na ka bynta ki paidbah ka dong ka thaiñ baroh kawei.
Ha katei ka sngi la rakhe ïa kane ka sngi da kaba la pynlong ïa ka prokram ba ishongkun, ha kaba u myntri ka tnat ka koit ka khiah ka jylla u James P. K Sangma, u la don ryngkat kum u kongsan. Kiwei pat kiba la sakhi lang ïa kane ka sngi, ki long u Principal Secretary ka tnat ka koit ka khiah ka jylla u Sampath Kumar, u MDC ka thaiñ, u Bah Batskhem Ryntathiang, u Archbishop ka Shillong u Archbishop Victor Lyngdoh, u Deputy Commissioner ka Eastern West Khasi Hills District, u Bah Wilfred Nongsiej, I Provincial Superior ka Holy Cross North Indian Province, I Sister Linet, I Administrator ka Holy Cross Health Centre Mairang, I Sister Jesse Jose, ki Doktor, ki ophisar sorkar, ki nongïalam shnong ka thaiñ bad kiwei kiwei.
Ha ka jingkren kum u kongsan, u myntri ka tnat ka koit ka khiah jong ka jylla, u James P.K Sangma haba ai khublei ïa ki bor pynïaid jong ka Holy Cross Health Centre Mairang halor u mawmer jong ka jingdap 25 snem jong ka, u la ïaroh halor ka jingïaid lynti jong kane ka jaka ai jingsumar nongpang naduh ba la sdang ïa ka. U la pynpaw ruh ïa ki kyntien ai jingïaroh ïa ka mynsiem trei shitom, wat hapdeng kiba bun ki jingeh kiba bun ba ki nongpynïaid ki la hap ban mad lyngba ki snem.
U la ong ruh ba ka jingdon jong ka Holy Cross Health Centre, ka long sakhi ïa ka jingtrei shitom bad jinglenlade jong ki bor pynïaid jong kane ka jaka sumar nongpang bad ki jingpyrshang jong ki ban ai ïa la ka jingshakri sha ki paidbah jong ka dong ka thaiñ.
U kongsan u la ong ruh ba ka jingrakhe ïa kane ka jubili rupa, ka pynïoh ha ki nongpynïaid ïa ka lad ka kabu ban phai dien sha ki snem ba la leit noh, ban kynmaw ïa u synñiang ba ki nongtrei bad nongpynïaid kiba hashwa bad kiba mynta, kiba la noh bad ban phaikhmat pat sha ka lawei bad ki thong thymmai nangne shakhmat, kum shibynta jong ka jingbteng ïa la ka jingshakri ïa ki paidbah ka thaiñ.
Haba kren halor ki jingïatreilang hapdeng ka sorkar bad ki kynhun shimet ha ki por ba la leit noh, u myntri ka tnat ka koit ka khiah u la pynpaw ïa ka jingkyrmen ban ïohi shuh shuh ïa kiwei pat kiba kum kita ki jingïateh lok ha ki por ban bud, kum shibynta jong ka jingshakri ïa ki paidbah nongshong shnong lyngba ka tnat ka koit ka khiah.
La pynphuh pynphieng shuh shuh ïa kane ka jingrakhe da ki jingshad bad jingrwai na ki nongtrei jong ka Holy Cross Health Centre. Ha kane ka sngi la ïoh ruh ban pynkup burom ïa ki katto katne ki nongtrei jong kane ka jaka sumar nongpang.
Kiwei pat kiba la kren ha kane ka prokram ki kynthup ïa u Principal Secretary ka tnat ka koit ka khiah ka jylla Meghalaya, u Sampath Kumar, u Archbishop ka Shillong, u Archbishop Victor Lyngdoh, u Deputy Commissioner ka Eastern West Khasi Hills District, u Bah Wilfred Nongsiej, I Provincial Superior ka Holy Cross North Indian Province, I Sister Linet bad I Administrator ka Holy Cross Health Centre, Mairang, I Sister Jesse Jose.