Shillong, ïaïong, 02: U Myntri Rangbah ka Jylla Conrad Kongkal Sangma hynne ka sngi palei, ula iaroh ïa ka rai jong ka Ministry of Home Affairs (MHA) ban nang pynduna ïa ki jaka kiba la ithuh kum ki ‘Disturbed Areas’ (jaka ba jur ki kam kaikhlaw) hapoh ka Armed Forces Special Powers Act (AFSPA) ha Jylla Nagaland, Assam bad Manipur.
Haba ïakren bad ki nongthoh khubor, u Conrad ula ong “Ngi pdiang sngewbha ïa ka rai jong ka Sorkar India ban nang pynduna ïa ki jaka kiba treikam ka AFSPA ha ka thaiñ Shatei Lam Mihngi. Nga ai khublei kyrpang ïa u Myntri Rangbah Duh ka Ri bad Myntri kam Pohïing ba kila shim ïa kane ka sienjam ba donkam eh na ka bynta ka bit ka biang jong ki paidbah ka thaiñ”.
U Conrad u ong ba ka jingweng noh ïa ka AFSPA ka dei ka jingdawa bala slem bha jong ki paidbah ka thaiñ Shatei Lammihngi baroh kawei hynrei ka jingpynbna ban nang pynduna ïa ki jaka ba treikam ka AFSPA khlem pep ka dei ka khubor kaba bha ïa ki paidbah ka thaiñ bad ka dei ka sienjam kaba pdiang.
Haba banjur ba dei ban weng noh shisyndon ïa ka AFSPA na ka thaiñ haba khmih ïa ka jinglong jingman ba mynta, u Conrad ula ong “Ka AFSPA ka dei ka aiñ ka bym iahap shuh ban nang pyntreikam kat kum ka por bad kam shym la lah ruh ban poi sha ka thong ba thmu”.
Hynrei watla katta u aikhublei ïa u Myntri Rangbah Duh Narendra Modi bad Myntri kam Pohïing Amit Shah halor ka sienjam bala shim bad pynpaw ruh ba kane ka dei ka dak halor ka jingsngew jong ki na ka bynta ki paidbah ka thaiñ Shatei Lam Mihngi.
Ka Sorkar India hynne ka sngi palei kala pynbna ban pynduna ïa ki jaka bala pynbna kum ki disturbed area hapoh ka AFSPA ha Nagaland, Assam bad Manipur hadien bun phew snem bala pyntreikam ïa ka namar kam shym la paw satia ba ka iarap ha kaban wanrah ïa ka jingshongshngaiñ ha kine ki Jylla bad ka thaiñ Shatei Lam Mihngi baroh kawei. Kane ka jingpynbna kan treikam naduh ka 1 tarik Ïaiong 2022.
