ïaroh ka Programme Lead, Prime Rural ïa ki tiar shna hi ba pynmih na East Jaiñtia Hills

Khliehriat, Nailar, 02: Ka East Jaiñtia Hills District ka dei kawei na ki district kaba la kiew bha ha ki kam shna jingshna ba shna ïa ki jait tiar da ka kti lane handicraft, katba nang iaid ki por la iohi ba bun ki briew kiba don ka sap ha kaba shna jingshna ki la mih shakhmat bad pynlong ruh ïa kane ka kam kum ka lad kamai bad kane ka la iarap shikatdei eh ha kaba kyntiew ïa ka ioh ka kot jong ki.
Myn ha ka 31 tarik u naitung, kum ka kongsan, ka Minha Riyaz Khan, kaba dei ka heh jong Programme Lead, Prime Rural ka la wan ban plie paidbah ïa kawei ka dukan kaba long kum ka pick up cente, ka East Side Smart Product ha Lad Sutnga ba hap ha ka shnong Dkhiah East, ha lynti ban leit sha shi kilo, ha kane ka dukan ne centre la lum ïa baroh ki jait tiar bapher bapher ba la shna hi da ki kti kiba na ki shnong bapher bapher jong ka East Jaiñtia Hills District.
Katei ka kongsan ka la ai ka jingroh ïa ki tiar shna hi ba la pynmih na East Jaiñtia Hills District bad ong ba ki long kiba kham pher bad kiba itynnad jaduh katta katta, ka la kular ba kan sa nang bteng shuh shuh ia ka jingïatreilang ban kyrshan ruh ïa kine ki briew kiba don sap ha kaba shna ïa ki tiar ki tar kiba itynnad bad kiba kham pher ki ba lah ban iarap ïa ki ha kaba ktbtiew ïa kane ka kam ha ka khaïi pateng.
Ka la ong ruh ba ïa ki jait tiar kiba la shna da ki siej bad ki thri kum ki kriah, ki shang, ki soh shkor bad kiwei kiwei ba la shna da ka kong Jhensi Suchiang bad ka kong Dakaemishwa Shadap ki dei ki ba la tikna bha ba kin iaid ïew wat shabar ka jylla Meghalaya ruh wat lada die ha ka dor ba rem ruh “Kine ki tiar ba shna da ki siej bad da ki thri ki briew khamtam kiba na bar ka jylla ki kwah bha ban ioh bad ban thied bad kumta khnang ban pynurlong ban ioh ban die sah bar, ngi ai jingiarap ïa ki da ki machine, ki solar bad kiwei kiwei khnang ban kyntiew ïa ka jingpynmih ïa kine ki jait tiar ba shna hi da ki siej bad ki thri” bynrap ka Minha Riyaz Khan.
Ka la iaroh ruh ïa ka jingpynmih ïa ki jait sboh, ki jait wine bad ong ba ka kong Ïahphang Dkhar ka la dep ioh ïa ka licence ban die ïa kine ki wine ba ka shna hi.
Kumjuh ruh ki tiar kum ki jait jingbam ne jingdih ki dei kiba la ioh jingbit ne ioh licence ha kaba kine kiba pynmih ki la lah mynta ban die ïa ki wat shaduh bar ka ri ruh.
Na ka liang u bah G.Pala, u Officer jong ka DCIC East Jaiñtia Hills District, u la ai ka jingkitbok kitrwiang ïa kitei ki hynriew ngut ki briew ba don ka sap ka phong kiba la lah ban lum ïa ki tiar ba ki shna hi ha kane ka dukan ha East Side Smart Products, u la ong ruh ba na ka liang ka tnat DCIC ruh kan kyrshan ïa ki katba lah lyngba ki jait skim bapher bapher ban iarap ban kyntiew ïa ka khaïi ka pateng da kaba die ïa kine ki tiar ba ki la shna hi.
Ïa katei ka East Side Smart Product, la pyniaid da ki hynriew ngut ki briew kiba dei ki nongkhaïi ne entrepreneur ba kynthup u bah Hameki Salahe, uba na shnong Samasi, ka Dakaemeshwa Shadap, kaba na shnong Byrwai, ka Jhensi Suchiang, kaba na shnong Sohkymphor, ka kong Ïahphang Dkhar, kaba na Tuber Sohshrieh, ka kong Kyrsiew Ryngkhlem kaba na Wapungskur bad ka Nishwa Kanai kaba na shnong Narwan, kine ki hynriew ngut ki dei kiba kiba kiba ka paw bha ha East Jaiñtia Hills District kiba la pynmih ïa ki tiar ki tar ba ki shna hi bad ïa ki tiar jong ki la lum lang ha kane ka dukan ban die sha ki paidbah.
Ki tiar ba la lum ha kane ka dukan ki kynthup ki tiar ba shna ka kong Jhensi Suchiang, kaba la shna ïa ki shuki thri, ki mura shnong ba thaiñ da ki thri ne ki siej, ki jait kriah ba pher bapher bad kiba wandur itynnad, ki soh shkor kiba da ki thri bad kiwei kiwei ki jait tiar ba la shna na ki siej ne ki thri.
U bah Hameki Sala he u dei uba na ka shnong Samasi, une pat u shna ïa ki dawai sait painkhana, ki dawai sait ïing bad u la ai kyrteng SASA bad kiwei kiwei kiwei ruh ki jait jingshna, ka kong Dakaemishwa Shadap, ka shna ïa ki jait tiar da ki siej bad ki thri kiba la pynwandur itynnad bha.
Ka kong Nishwa Kanai, ka shna ïa ki sabon sait jaiñ bad ai kyryeng N.K.Soap, ka la iathuh ba ki la ju don ki briew kiba la phone sha ka namar ki kwah ïa kane ka sabon ba ka shna hi, ka kong Kyrsiew Ryngkhlem pat ka shna ïa ki jait sboh bad ki sabon sum ba bun jait bad ba la oh shrong itynnad ruh, ïa ki sabon ka la shna da ki lemon grass bad u shynrai, ki alovera, ka la iathuh ba ka la ioh ki jinghikai ha kine ki kam bad ong ba ka don ka jingiohnong ruh na kaba die ïa kine ki sabon namar ki briew ki thied bha.
Ka kong Ïahphnang Dkhar, ka long kmie kaba la paw bha ha ka rep soh strawberry, ka la pynmih ruh ïa ki jait jingdih kum ki wine bapher bapher bad u shynrai Lakadong uba bha bad ha kaba iadei bad ki wine kiba ka la shna hi, ka kong Ïahphang ka la ioh ruh ïa ka license ban die bad pyniaid ïew.
La sngewthuh ba kane ka kam jong kito ki briew kiba don ka sap ban shna jingshna da ki kti kan kiew shaphrang ha East Jaiñtia Hills District da ka jingiarap bad jingkyrshan lang ka Programme Lead, Prime Rural lem bad ka tnat DCIC bad kane kan iarap ruh ym tang ban kyntiew ïa ka ioh ka kot jong ki riew don sap hynrei kan iarap ha kaba kyntiew ruh ïa ka sap ka phong jong kito ki briew kiba don ka sap ha kaba shna ïa ki jait tiar bapher bapher tang da ki kti.