Nongpoh, Rymphang 18: Ka Myntri jong ka sorkar pdeng ba dei peit ïa ka tnad Consumer Affairs, Food and Public Distribution, ka Nimuben J Bambhaniya mynta ka sngi ka la wan ban iuhkjat ha Ri-Bhoi District ban buddien ïa ki kam pynroi kiba la pyntrei ha kane ka District kaba la ïohnam ruh kum ka Aspirational District bad Aspirational Block da kaba pynleit jingmut ruh ha ki 5 tylli ki mat ba kongsan kum ka koit ka khiah, ka pule puthi, ka rep ka riang, ka umbam umdih nalor kiwei ba ban leit jngoh ruh ïa ki shnong bapher bapher.
Katei ka myntri ka la shong ruh da ka jingïalang bad ki ophisar ha Conference Hall jong ka ophis u Deputy Commissioner ka Ri-Bhoi District ha Nongpoh ha ka jingdonlang u Pravin Bakshi, Commissioner & Secretary Food & Civil Supplies & Consumer Affairs, Abhilash Baranwal, Deputy Commissioner ka Ri-Bhoi, ka Jagriti Rohit Singla Private Secretary to the Hon’ble Union Minister, ka V.Kezo, Asst. Commissioner, u R. Brahma, ADC cum Project Director DRDA, Bah M.B Tongper ADC, ki ophisar na ki tnad sorkar bapher bapher bad kiwei kiwei.
Ha katei ka jingïalang na ka liang u DC ka Ri-Bhoi u la pynshai ruh halor ka jingïaid shaphrang jong ki kam ha ki tnad sorkar bapher bapher ka Ri-Bhoi District kiba la pyntrei hapoh ka Aspirational District Programme.
Ka Myntri ka la pynpaw ba kane ka dei ka sien ba nyngkong ba ka wan ban iuhkjat ha kane ka Aspirational District jong ka jylla Meghalaya bad pynpaw ruh ka jingsngewhun bad ai ka jingïaroh ïa ki kam bana ïaid shaphrang hapoh ka district bad ai ruh ka jingkhublei ba kyrpang ïa ka sorkar pdeng hapoh ka jingïalam jong u Narendra Modi ban lam ïa ka ri India sha khmat, ryngkat ka jingkyntu halor ka jingdonkam ka jingïatreilang na baroh ki liang ban kyntiew ïa ki kam pynroi hapoh ka district.
Hadien katei ka jingïalang ban lum jingtip ïa ki skhim pynroi ba la pyntreikam ha ka district na ka liang ka myntri ryngkat ki ophisar ki la leit ruh ban jurip ïa ka Narang Sub-Centre, ka Laybye market ha Dulongnar, Pineapple Processing Unit ha ka shnong Umdihar, ka jingpyntreikam ïa ka skhim MGNREGA ha ka shnong Erpakon bad kumjuh ruh ka pyntreikam ïa ka skhim JJM ha ka shnong Quinine.
