Shillong, Ïaïong 03: Ka BJP-Meghalaya ha ka sngi Palei ka la ïaroh ïa ka Waqf Amendment Bill bad ai khublei ïa ka Sorkar Pdeng ba la ïalam da u Narendra Modi bad kumjuh ïa baroh ki paralok NDA halor ka jingmynjur ïa kane ka Bill ha Lok Sabha.
Na ka liang ka BJP Meghalaya ka pdiang ïa ka jingpynrung ïa ka kyndon ba ong ba ym dei ban pynbna ne kheiñ kum ki nongkynti Waqf ïa kano kano ka jaka jong ki riewlum katkum ka Fifth Schedule bad Sixth Schedule jong ka Riti Synshar ka Ri.
Ha ka kyrwoh khubor na ka liang u Bah Wankitbok Pohshna, State General Secretary ka BJP Meghalaya u la ong, “Sa shisien la pynshisha biang ba tang ka Sorkar NDA ba ïalam da ka BJP kaba lah ban ïada ïa ka hok ki ritpaid bad ki paid riewlum jong kane ka Ri.”
Ula ong, “Kane ka kyndon ha ka Aiñ ka pynthikna ba kino kino ki jaka hapoh ka jylla jong ngi ba la kdup da ka Sixth Schedule kin dei kiba ïada na ka jingkyntur ka Waqf. Ka dei ïa ka ban lehkmen da baroh ha Meghalaya”.
U la ong, “Ka long kaba donkam ban kynmaw ba haba sdang jong kane ka taïew, ka Catholic Bishop Conference of India ka la mih ban kyrshan ïa ka Waqf Amendment Bill bad kyntu ïa ki seng saiñ pyrthei ba kin shim ïa ka rukom treikam kaba khlem shah liang bad kaba tei halor kane ka mat.”
“Hynrei kito kiba pyrshah ïa ka Waqf Bill ki dei ki bym kheiñ snep ïa ka sur jong ki rit paid haba kam ïalade ba ki dei ki champion ha ka hok ki ri tpaid. Kum kine ki buit thok kaba thmu ban pynphriang ïa ki jingtip ba bakla khlem ka jingpyrwa bad leh bym hok ka lah ban bteng hynrei kam don jaka satia hapoh ka jinglong nongïalam u Myntri Rangbah Duh Narendra Modi,” u la ïathuh.
