ïarap ka TULBA ïa u rangbah uba shu thiah pang 13 snem na ka shnong Domruah-Domsehkhon

Mawkyrwat, ‘Nailur, 01: Ka “The Ultimate legend Bikers Association” (TULBA) ne ka kynhun jong ki nongñiah ar shaka jong ka Mawkyrwat, South West Khasi Hillls District ha ka sngi saitjaiñ jong ka taïew da ka jingïasnohktilang ki para dkhot bad ki ‘riew rangbah ki la ïoh ban ïa synñiang pisa lem na ka bynta kiba shem jingeh ha ïing ha sem, ki la leit ai jingïarap da ka song pisa ïa u samla Baphyrnai Lyngkhoi uba la don 19 snem karta ba la thiah pang la 13 snem uba dei na ka shnong Domruah- Domsehkhon, South West Khasi Hillls District.
Katkum ka jingïathuh ka kmie san jong u Baphyrnai Lyngkhoi, ka kong Selphina Lyngkhoi ba une u Baphyrnai u dei u khunswet namar ki kmie ki kpa ki la khlad noh na kane ka sla pyrthei ha kaba u ne u Baphyrnai Lyngkhoi u la ïoh ïa kane ka jingpang naduh ba ula dap 6 snem ka karta bad ha ka jingleit wad dawai ha kylleng ki jaka sumar nongpang kiba don ha ka jylla hynrei kam shem la don kano kano ka jingïarap ban pynjem ïa une u samla, haduh ba un hap ban thiah thik ha ka jingthiah bad um lah shuh tang ban pynkhih na ka daw ka jingjur palat kane ka jingpang kaba kot mynta la 13 snem ba un ban thiah hajuh.
Halor kane ka jingjia na ka liang u bah Karnatik Lyngdoh Tongkhar, President jong ka TULBA bad u babu Phasmandar Kharsyiemlieh ki la kyrpad ïa kiwei de ki dkhot jong ka jaitbynriew kiba don ka jingsngewlem ban ïarap lem kum ïa kine ki briew kiba ïa kynduh ïa ki jingeh ha ka pang ka shitom.
Ka TULBA ka la ïoh ruh ban aiti ïa ka song pisa bad la ïoh ruh ka jingduwai bad ki kyntien ai mynsiem ïa une u samla Baphyrnai Lyngkhoi ba un ïoh noh ka jingkoid jingkhiah.