Nongstoiñ, Nailur, 17: Uwei u briew u la ïap bad 4 ngut kila mynsaw na ka jinghap kawei ka kali shapoh ka riat ha Sohwanthiang West Khasi Hills District ha ka sngi Saitjaiñ.
Katkum ka khubor Pulit, kane ka jingjia ka la jia ha ka step por 12:30 baje jong ka sngi saitjaiñ bad la pyntip ba kane ka kali (Maruti Car) ba don u nombor ML05-A-8768 ka dei kaba wan na Pamphyrnai bad thmu ban leit sha Tiehsaw Khyllem.
Ki Pulit ki ïathuh ba ha kane ka jingjia, 5 ngut ki briew ki la mynsaw bad kine ki dei ki Bah Referless Thongni na Mawkohïaw Nongkhlaw, Bah Oblanding Syiemlieh na Dihwah Shatmoit, u Rahul Sangma of Goalpara, Assam bad u Bah Donborlang Thongni na Tiehsaw khyllem.
Ïa kine kiba mynsaw la pynkit mar mar sah Markasa PHC ban ïoh jingsumar bad hadien la pynkynriah noh sha Shillong Civil Hospital ban ïoh ïa ka jingsumar ba kham paka.
Hynrei, la ïathuh ba uwei na kine kiba mynsaw, u Rahul Sangma u la khlad noh ha Shillong Civil Hospital namar ka jingjur ka jingmynsaw. Ki Pulit ki la register case halor kane ka jingjia bad ka jingtohkit mynta ka la ïaid shakhmat.
