Shillong, Nailar, 21: Arngut ki rangbah ki la mynsaw jur katba uwei pat u la khladnoh hadien ki la shah pom ha u Pyrthat rkhiang ha ka sngi U Blei ha ka por kumba 3:45 baje nohphai sngi katba ki dang rieh slap ha trai dieng kseh ha madan Golflink, Shillong.
Katkum ka jingïathuh jong ki paidbah ki la sakhi ïa kane ka jingjia, kine ki lai ngut ki rangbah la lap ba ki la thiah lyngktar ha madan phlang Golflink hadien ba ki la shah pom ha u pyrthat.
Ïa kine ki lai ngut, la pynkit noh sha Shillong Civil Hospital bad ki doktor ki la pynbna ba u Dinesh Nonglang uba la 37 snem ka rta, uba sah ha Mawlai Umjaiur, Shillong u la khladnoh.
Ha ka jingtohkit, la lap ba kine ki lai ngut shiparalok, ki la leit ïalehkai phutbol ha Golflink Golf Course bad ynda la ther u lapbah uba jur, ki la leit rieh slap ha trai dieng kseh bad dei ha kum kane ka por ba ka liehlieh ka la pom ïa u dieng ba ki rieh slap bad baroh lai ngut ki la kyllon ïap ler ha madan.
