Nongpoh, Jylliew 11: Uwei u rangbah u la duh noh ïa la ka jingim hadien ba ka thuk thuk (Scooty) kaba u niah, ka la shah tynrah ha kawei ka trok dumper hynne ka janmiet hajan ka skulbah USTM.
Kane ka jingjia la kynnoh ba kala jia namar ka jingniah khlem akor jong u nongniah trok uba la pynher sted ïa ka kali bad leit tynrah beit beit ïa kane ka scooty. Kane ka trok ka dei kaba mih na ki thaiñ Killing bad kaba thmu ban hiar sha Guwahati.
Une u nongniah scooty u kyrteng u Killing Mikhin ba 46 snem ka rta, uba dei na ka Shnong Bara Killing bad ïa ka met jong u, la pynkit noh sha Nongpoh Civil Hospital ban leh ïa ka post mortem.
Ki Pulit ki pyntip ba u nongniah jong kane ka trok ula phet krad tang marsyn jia kane ka jngjia.
Ki paidbah haba ïoh jingtip ïa kane ka jingjia, kila ïamih sha surok bad da ka jingbitar, kila ïalun maw bad thmu ban wiang ding ïa kane ka trok hynrei da ka jingkloi ban tuklar ki Pulit ka Khanapara Police Station bad ki CRPF ha ryngkat ki Nongïalam Shnong, la lah ban pynjai jai ïa ki paidbah.
Ki Pulit kila register case halor kane ka jingjia bad ka jingtohkit mynta kala ïaid shakhmat.
