Nongpoh, Naiwieng 29: Ha kawei ka jingjia aksiden ha ka miet sngi Baar, uwei u nongbud jong kawei ka trok u la duh noh ïa la ka jingim hadien ba kawei ka trok kit Clinker kaba don ïa u number WB 91 8529 ka la noh sha riat ha kawei ka jaka khongdong ha Shangbangla kaba dei ka jaka kaba ju jia khah khah ki jingjia aksiden.
Katkum ka jingtip ba la ioh lum la ïathuh ba kane ka la jia ha ka sngi Baar ha ka por kumba 10 duna eiei ha kaba la suba ruh ba ka trok ka la phiel break haduh u nongñiah um lah shuh ban tehlakam ïa ka kali haduh ba kan da noh syndon sha riat.
Ha kane ka jingjia katto katne ngut ki briew kiba ju shong dukan die soh ha kane ka jaka ki la lait thaw na ka jingjia basngewsih namarba ki la mih noh na kane ka jaka hadien ba ki ladep ban khang dukan ha kaba ka trok ka la rat ruh katto katne tylli ki dukan kiba don harud surokbah National Highway 6 kaba la wanrah ka jingduhnong ïa ki nongshong dukan.
Na ka liang jong ki Pulit ka Ri-Bhoi ki la leit mar mar sha kane ka jaka hadien katei ka jingjia bad pynkit noh ïa uba mynsaw sha Civil Hospital Nongpoh ban ïoh ka jingsumar, katba ïa ka met jong uba la khlad noh la ïoh ban sei mynta ka step sngi Balang bad pynkit noh sha Civil Hospital na ka bynta ban leh ïa ka postmortem.
