ïap lang ki sniang ba ri la jong hadien ba shim ki Sniang na ka Sorkar, ong ki nongri jingri

Nongstoiñ, K’lyngkot 11: Ka jingwanrah khun sniang jong u Myntri Rangbah na shabar ka jylla ban sam sha ki nongri sñiang ha ka jylla, ka la pynduhnong haduh katta katta ïa ki nongri sniang kiba napoh ka jylla la jong, ong ki nongri sniang na man la ki shnong jong ka West Khasi Hills haba pyntip ha u nongthoh khubor mynta ka sngi.
U bah K.Nongsiej uwei na ki nongri sniang na ki thaiñ Nongstoiñ, u la ong ba ha shuwa ba Myntri Rangbah un sdang ban wan rah khun sñiang na shabar ka jylla, ki khun sñiang napoh ka jylla khamtam ha West Khasi Hills, ki shongdor san haduh hynriew hajar tyngka uwei, kata ruh kiba dang dap tang shi bnai naduh ba la kha.
Kum u riew tymmen u ba smat bha ban ri jingri u ri ar tylli ki sniang pynkha khun, kawei kawei ka ju kha shiphew haduh khatwei tylli bad haba die, ha ka doh hynriew hajar kamih palat shi lak tyngka shisien die bad ha ka shi snem u ju ïoh ban die khun sniang haduh arsien.
U la kren bynñiaw da kaba ong ba naduh ba u Myntri Rangbah u la wan sam ei ïa ki khun sniang sha ki paitbah, ka dor ki khun sñiang ba u ri ka poi satang ar bad lai hajar tyngka uwei, kata ruh kiba la dap ar bnai tam naduh ba la kha. U la ong ruh ba ki khun sniang ba u Myntri Rangbah u wanrah, ki dei kiba ka sorkar ka la leit thied na shabar jylla bad ka jingthied ïa ki khun sniang na shabar ka jylla naduh ba sdang haduh kine ki sngi, ka la poi da ki spah klur bad ïa katei ka spah klur la shu leit bret kai sha bar jylla.
U la ong ruh ba jin lada ka sorkar ka pynbna ïar hapoh ka jylla ba ka donkam khun sñiang ban sam sha ki paitbah, kan long ka jingkyrkhu na ka bynta kito kiba don khun sniang ba kin wan die sha ka sorkar. Kane ka la pynriewspah kloi ïa baroh ki nongri sniang.
U bah Nongsiej u la ong ruh ba kaba sngewsih ka long ba ki khun sniang kiba ka sorkar ka la wan ban sam hapoh West Khasi Hills, kata ha Nongstoiñ, Rambrai, Nonglang bad Shallang, ki la kylla long pynban ka bih kaba khraw ïa ki sñiang jong ki nong ri haman la ki shnong. Namar haduh mynta ki khun sniang kiba la sam sha ki paitbah ka thaiñ Nongstoiñ, ki la jan ïap lut bad ki don ruh ki nongshong shnong kiba shu bret ha khlaw ïa ki khun sniang ba la ïap, khlem da tep satia bad haba ki ksew ki leit bam baroh ki sniang hapoh shnong ki ïap lut.
Dang ha kine ki sngi u bah P.Snaitang u la ïathuh ba u la ïoh ar tylli ki khun sniang ha ka por ba sam ha Nongstoiñ, uwei u la ïap uwei pat u dang im haduh mynta. Hynrei kiwei pat ki paralok jong u kiba ïoh mar ar tylli mynta kim don khun sniang shuh namar ki la ïap lut.