Nongstoiñ, Jymmang, 02: Ka jingther u lapbah ryngkat ka ‘lei lieh u pyrthat bad u phria ha ka sngi palei ha ki katto katne ki bynta jong ka West Khasi Hills, ka la wanrah ïa ka jingjot ym tang ki ïing ki sem hynrei ka jingduh noh ïa ki jingri na ka jingpom jong u pyrthat.
Ka jingpom jong u pyrthat ka la jia ha ka shnong Thiepkseh West Khasi Hills kaba don ha ki thaiñ Rambrai hajan ka shnong Mawrok ha kaba khyndai tylli ki masi jong u bah Roland Lyngdoh ki la ïap.
U sordar jong katei ka shnong haba pyntip ha u nongthoh khubor, u la ong ba katei ka jingpom pyrthat ïa kitei ki masi, ka la jia ha ka por shiteng sngi ha kawei ka jaka harud shnong bad baroh khyndai tylli ki masi ki la shongdor kumba lai lak tam.
U la ong ruh ba ha katei ka sngi ha ka por janmiet ki masi kim wanphai shuh sha sem, ha kaba na ka liang u trai u la leit wad sha lum bad u la lap ba baroh khyndai tylli ki masi ki la ïap.
Ha ka step jong ka sngi thohdieng u la wan ban pyntip ha u sordar bad u sordar u la leit ban pyntip ïa katei ka jingjia ha u Gramsevak bad u BDO jong ka Nongstoiñ Block. U la kyrpad ruh ïa ki bor sorkar ba kin thaw ki lad ban ïarap lem ha kiba kum kine ki jingjia ryngkhat na ka jingshah lynshop ha ki bor ka mariang.
