Mairang, Nailar 12: U Samla Hopefullness Lyngdoh, uba dang pule Class XI ha Langtor Higher Secondary School, Langtor, u la leh ïa ka kam shlur bad lah ïa ka kam kaba ki Pulit kim shym la lah ban leh.
Kane kadei ka jingïoh sei jong u ïa ka metïap jong uwei u Khynnah Skul ba dang shong Class VIII ha Little Star Secondary School kaba don marjan bad ka skul Langtor.
Katkum ka jingïathuh u Sordar ka ShnongNongbah Bynther,la ong ba mynta ka sngi, une u khynnah Little Star u leit sum ha Wah Kynshi kaba hap ha ka Shnong Nongbah Bynther, hadien ba la wai skul bad u dang ap ban leit khreh kot.
Hynrei katba u dang sum bad ki paralok, kynsan kynsan u la ngam ha kane ka wah. Kiwei pat ki paralok haba ki la ïohi ïa ka jingngam jong u, ki la pyrta briew bad pyntip ruh sha skul.
Hadien la wan sa ki Sordar bad ki Nongïalam Shnong kiba la pyntip pat sha ki Pulit bad ki Pulit ki la wan ryngkat ki Pulit Fire Service kiba la ngam ha wah ban wad ïa une u Khynnah u ba la ngam ha um. Hynrei wat lada ki la trei shitom bad ngam bunsien ruh, shym la lap ïa une u Khynnah Class VIII.
U Hopefullness, uba la don lang ha katei jaka ryngkat kiwei pat ki para Khynnah skul, haba u la ïohi ba ym lap katno katno ruh ïa une u Khynnah, u la pan na ki Pulit bad na ki Nongïalam Shnong. Hadien ba ki la shah, u Hopefullness, uba dei na ka Shnong Tiehnongbah, u la ngam ba tang shiphang, u la lah ban sei ïa ka met jong une u Khynnah Class VIII,uba la khlad noh bad uba dei na ka Shnong Dewsaw, ka Shnong kaba don sharum Mairang marjan bad ka Shyrwang.
Hadien ba la sei ïa ka met jong une u Khynnah, namar ba ki Pulit ki don lang markhmat bad ki Nongïalam Shnong la pynkit noh ïa ka met jong une u Khynnah ban rah noh sha ïing jong u ha Dewsaw.
Kane ka jingshlur bad jingtbit ngam um u Hopefulness kala wanrah ïa ka jingïaroh na kiba bun ha kaba ki la pynpaw ba ka jingdon bad ka jingshlur jong u, la lah ban sei ïa ka met une u khynnnah skul Little Star.
