Guwahati, Nailur 17 : Kawei ka samla ba 23 snem ka rta na Jylla Meghalaya, kala iap hashen na jinghap nalor kawei ka ïing bun mala ha ka thaiñ Bamunimaidan, Guwahati ha ka sngi Saitjain. Kat kum ka khubor, kane ka jingjia kala jia ha ka Subansiri Apartment kaba don marjan ka Government Press ha Bamunimaidan bad kane ka samla kala hap nalor ka mala ba hynriew.
ïa kane ka samla la tip kyrteng kum ka Tangsi K Sangma, kaba dei ka nongshong shnong ka Lejadubi, West Khasi Hills. Ki Pulit kila lap ruh ïa ka mobile phone, ka bek pisa bad ka slipar na kane ka jaka ba ka hap. Kat kum ka jingïathuh ki trai Shnong, ki shijur kiba ïasah ha kane ka flat, ki la phet na la ïing mar syn dep jia kane ka jingjia.
Haduh ba thoh ïa ka khubor, ym shym la lah satia ban tip ïa ki daw ha lyndet kane ka jingjia. Ka jingtohkit jong ki Pulit ka la ïaid shakhmat ban pynthikna la ka dei ka jingjia ryngkhat, ka jingshah khynniat ne ka jingdkhat jubor ïa la ka jingim.
