Ïamir jingtip ka Khasi Deptt. NEHU halor ka pule bishar ïa ka ktien, literashor bad ka Kolshor

Shillong, Naiwieng, 23: Ka Khasi Department, NEHU, Shillong ka la pynlong ïa ka lympung ïamir jingtip ba shisngi ha ka 21 mynta u bnai ha Science Seminar Hall, North-Eastern University, Shillong halor ka phang “Ka Pule Bishar ïa ka Ktien, Litereshor bad ka Kolshor kat kum ki Seng nia bapher”.
Ïa ka jingïalang plie la pynïaid da ka Head jong ka Department Khasi, North-Eastern Hill University, Shillong, ka Prof. Streamlet Dkhar. U Bah Pynïaid Sing Syiem, CEM jong ka Khasi Hills Autonomous District Council uba la don ryngkat kum u Kongsan ha kane ka lympung ïamir jingtip, u la ban jur ban pynneh pynsah ïa ki Riti bat Khyndew bat Shyiap u Khasi. U la ong ba ka Jaitbynriew Khasi ka long kaba kyrpang shisha ba ka don ïa kine ki bri bad kita ki long kum ki Ri Raid, Ri Kur bad ki Ri Nongkynti. Ka jingdon jong kine ki Ri ka long ban kyntiew ïa ka ïoh ka kot, ban pynbiang ïa ki jingdonkam bad ban pynneh pynsah ïa ka jinglong tynrai.
U Kongsan ha kane ka jingkren jong u, u la kynthoh shuh shuh ïa ka jinglong kyrpang jong ka jaitbynriew Khasi bad kata ka long ba u Khasi u la don lypa ïa ki Aiñ kiba la shu ïathuh pateng da ka Ktien ha shuwa ba ngin ïoh ïa ki Aiñ ha ki jingthoh. Ka jingdon jong ki Aiñ ba la shu ïathuh da ka Ktien ka pyni ba u Khasi u batskhem ïa ka Hok ka Shikyntien. U ong ruh ba ka jingdon jong ki Aiñ ha ki jingthoh ka ïarap shuh shuh ban pynbha ïa ka imlang sahlang. Ha kaba ïadei bad ka Ktien, u kongsan u ong ba kum ka jaitbynriew, ngi dei ban pynneh pynsah ïa la ka Ktien ha ka jingpyndonkam jong ngi ha ka jingim ba man ka sngi.
U la ai ruh ka jingkitbok kitrwiang ïa ki Riewshemphang ki ba la ai ïa ki paper jong ki ha kane ka lympung. U pynpaw ruh ba ka KHADC ka kloi ban ïatreilang bad ka Khasi Department, NEHU Shillong ha kaba ïadei bad ki lympung ïamir jingtip, ki jingwadbniah kiba kum kine. Ka jingdon jong ki nongwadbniah kan ïarap ban ngam jylliew ha ki jylli bapher bapher bad ban seng ruh ïa ki nongrim kiba ïadei bad ka thaw aiñ. U la ïathuh ba kumno ka KHADC ka la jied kumba 40 ngut ki stad wadbniah ba kin wadbniah ha ki jylli bapher bapher bad ïa kane la bei tyngka da ka KHADC. U kyrmen ba ka Khasi Department kan ïarap lang ïa ka KHADC ban pynbha shuh shuh ïa ka ri bad ka jaitbynriew.
Ka Prof. Antoinette Kharmalki, Department Khasi, North-Eastern Hill University, Shillong ka la ai ïa ka jingkren maitphang halor kane ka lympung ïamir jingtip bad ka la ong ba ki don shibun ki sengnia kiba lah ban pynshong nongrim haba leh ïa ka wadbniah ka la ai nuksa kum ka Postcolonial theory ha kaba ïadei bad ka Litereshor, ka Structuralism ha kaba ïadei bad ka Ktien bad ka Cultural Studies ha kaba ïadei bad ka Kolshor. Ka khmih lynti ba na kane ka lympung ïamir jingtip ki samla pule, ki nongwadbniah bad baroh kiba la wan ban ïashim bynta kin ïoh jingmyntoi.
Ïa ka sienshong banyngkong la pynïaid da ka Dr. Bandarilin Bairo kaba long ka nonghikai jong ka Khasi Department, NEHU, Shillong bad ki nongai paper ki long u Dr. Thomlin Lynshing na St. Anthony’s College, ka Balarishisha Nongkynrih na Shillong College, ka Rilin Gemma Lyngdoh na Sankardev College, u Slendar Dkhar na Jaintia Eastern College, Khliehriat. Ha ka Sien shong kaba ar pat, la pynïaid da u Dr. M.M. Khymdeit uba long u nonghikai ka Khasi Department, NEHU, Shillong bad ki nongai paper ki long u Dr. Rollingstone Wankhar na St. Anthony’s College Shillong, ka Roiparbha Khongkliam na Riwar College, Pynursla, ka Elizabeth Shylla na Nongtalang College, ka Frugiferous Diengdoh na St. Anthony’s College, Shillong, ka Lasubon Nongkynrih na J.J. M. Nichols Roy College, Shillong bad ka Jennifer Lyngkhoi na Balawan College, Umsning.
Ki nongïashim bynta ki long ki nonghikai na ki college bapher bapher kiba don ha nongbah Shillong, ki Research Scholar bad ki samla pule jong ka Khasi Department, NEHU, Shillong.