Mawkyrwat, ‘Naitung 13: U Deputy Commissioner jong ka South West Khasi Hills District u la pynlong ka jingïamir jingmut ryngkat ki Myntri Shnong, ki Seng Samla Shnong, ki Sengbhalang bapher bapher ha ka jingdon ryngkat u bah J.D. Kharwanlang, Superintendent of Police Mawkyrwat, ki ophisar na ki katto katne ki department ha kaba ïa dei bad ka jingjyllei jong u drok bad kumno ban tehlakam na ka jingpur sted jong u drok uba long u nongshong jong ka imlang sahlang hapoh ka Hall jong ka Maharam Government Higher Secondary School, Mawkyrwat.
Ha kane ka jingïalang ka la don ka jingïathir ïathaiñ halor ki mat ki jura bad kiba kumno ban thaw ki lad ki lynti ban shim bad ban tehlakam ïa ka jingsaphriang u drok ha kane ka South West Khasi Hills District.
Haba kren ha kane ka jingïalang ïamir jingmut bad haba shim ïa ka jingïaid jingmut jong baroh, u bah T. Lyngwa, IAS, Deputy Commissioner ka South West Khasi Hills District u la pynpaw ïa ka jingsngewdiaw halor ka jingnangjyllei jong ki nongdih droks hapoh ka South West Khasi Hills District bad da kaba shim ïa ka jingai jingmut jong kiba bun bad u la pynsngew ba yn sdang ban pyntreikam ïa kine ki jingai jingmut bad ban nang kham pynjanai shuh shuh ïa ka rukom treikam da kaba pynlong ka jingïakynduh kaba khah khah khnang ban lah ban weng ïa ki jingeh kiba ïa dei bad u drok.
Ha kajuh ka por u la pynsngew ba nangne shakhmat yn don ka jingpeit pyrman bad ka jingïaid pahara da ki pulit bad lada ki lap ïa kino kino ki kali kiba i-suba sniew bad kiba ïeng ha ki rud surok ha ki por mynmiet kin shah kylli tohkit kat kum ka aiñ. Ha kawei pat ka liang ula pynpaw ba ka long kaba eh ban kem ïa kiba dih ne kiba rah drok hapoh 3 grams namar kin ym lah ban ïaid lait katkum ka ANTF Act.
Namarkata, ka la dei ka por da kaba shim ruh ïa ka jingai jingmut da kaba u la rai ban pynlong ka jingïalang bad ki Seng Longkmie bad ban ïa trei ryngkat ryngkat bad ki shnong ki thaw bad ha kajuh ka por da kaba kyrpad ïa ki ban ai jingtip sha ki pulit lada ki ïohi lane shem ïa ki briew kiba i suba lane i shan khmat da kaba kyntu ïa ki paidbah lane ki shnong ki thaw ba ym shim ïa ka aiñ ha ka kti hynrei ban pyntip mar mar sha ki pulit ba kin leh ïa kaba donkam.
Shuh shuh u la pynpaw ïa ka jingdonkam katkum ka jingai jingmut ban don noh da ka ‘Oral Substitution Therapy’ ka ban pynbiang ïa ki stock ban ai ïa ki briew ha ka por ba ki donkam. Ha kaba ïa dei bad ka Rehabilitation Centre u la pynpaw ïa ka jingsngewdiaw ba ym don jaka sah na ka bynta ki kynthei lait tang ki shynrang bad lada bun ki kynthei kiba pyndonkam ïa u drok kan nang buh shuh shuh ha ka jingma namar ka lah ban wanrah sha ka jingjur jong ka jingpang AIDs.
Kumta ula kular ba nangne shakhmat yn sa shim khia ïa kane ka kam bad ban wer ïa ki SHGs na ka bynta ban don ka jingïasyllok bad ki longkmie bad ki samla kynthei ban kiar na kaba pyndonkam ïa u drok. U la kyrmen ruh ba lyngba ka jingïatreilang ryngkat ka jingïamir jingmut jong kiba bun yn lah ban ïa kynduh shuh ha ki por ki ban wan na ka bynta ban pyntyllun ïa ka kam shakhmat khnang ban poi sha ka thong ba ki thmu.
U bah E. Tariang, I/c District Social Welfare Officer (DSWO), South West Khasi Hills District u la ong ba ka jingpurstet jong u drok ka la poi shaduh ki kyndong ki kynshrot bad lyngba kane ka rynsan yn lah ban ïa pyrkhat da kino ki lad ki lynti ban tehlakam ïa ka jingkynrei jong une u nongshun uba sniew jong ka imlang ka sahlang. “Katkum ka jinglum jingtip haduh u snem 2021 ki nongdih drok ki don haduh 47 ngut”, ïathuh u bah E. Tariang.
Ha ka jingkren jong u Dr. W.L. Narry, Nodal Officer jong ka District Mental Health Office, South West Khasi Hills District u la ong ba ki nongdih drok borabor ka dei tang ka jingpang kaba ki ngat da kaba ki shah riam bad ki shah phon lyngba ki jingdih bad kiwei kiwei.
Ha kajuh ka por u la pynpaw ba kiba bun na kiba dih ki kwah ban ieh noh hynrei namar ka jingshahteh shah khum kim lah ban ieh noh shi syndon. Nangta u la pynpaw ba na ka bynta ban buh ïa ka Rehabilitation Centre hapoh jong ka South West Khasi Hills District kan long kaba eh ïa mynta shipor hynrei u la ai jingmut ba la i donkam shwa ban don da ka ‘Oral Substitution Therapy’ kaba lah ban ai jingïarap ïa kito kiba la kyrni ha ka jingdih drok.
U bah J.D. Kharwanlang, Superintendent of Police, South West Khasi Hills District u la ong ba na ka liang ka Police Department ka la trei shitom ban ïa khun tyngeh pyrshah ïa u drok da kaba ïaid ka lynti jong ka aiñ bad u la ong ba lyngba kane ka jingïakynduh u la wer ïa ki samla shnong, ki bor shnong ban don ka jingïatreilang bad ban ïa phylliew jingmut na ka bynta ban ïa pynduh jait ïa une u jingmlien ba sniew bad u kyrmen ba lyngba ka jingkyrshan bad ka jingai jingmut jong kiba bun yn lah ban treikam bha na ka bynta ka bit ka biang ha ka imlang ka sahlang.
U bah L.T. Tariang, MCS, Additional Deputy Commissioner ka South West Khasi Hills District u la ai ki kyntien jingaikhublei.
