Shillong Kyllalyngkot 22: Ki shipai Border Security Force (BSF) ka ri India bad ki shipai Border Guard Bangladesh (BGB) ka ri Bangladesh, mynta ka sngi, ki la ïashimbynta ha ka jingialang jong ka Sector Commander Level Co-ordination Meeting kaba la long ha ka thaiñ khappud jongka 193Bn BSF.
Ki BSF ki la pyntip ba ka jingthmu jong kane ka jingïalang ka long ban pynkhlaiñ ïa ka jingïadei hapdeng kine ki artylli ki ri bad ban don ïa ka jingïatreilang kaba janai ha ka jingpahara ha khappud.
ïa ka kynhun jong ka BSF la ïalam da u Manoj Kumar Barnwal uba long u DIG, Sector HQ BSF Shillong katba ïa ka kynhun jong ka BGB la ïalam da u Md. Saiful Islam Chowdhury uba long u Deputy Director General, Sector Commander BGB, Sylhet, Bangladesh.
Ki heh shipai ka BSF bad BGB kila ïatai sani halor ki mat kiba ktah ïa ki thaiñ khappud kum ka Co-ordinated Border Management Plan bad kiwei kiwei ki mat bad kumjuh ban don ïa ka jingïatreilang hapdeng ka jong ki.
Ki la pynpaw ïa ka jingsngewhun halor ka jingpynlong ïa kane ka jingïalang kaba pyni ïa ka jingdon ka jingïadei paralok hapdeng kine ki artylli ki ri bad ki ïengskhem ban pynlong ïa ka thaiñ khappud kaba shongsuk shongshngaiñ.
Ki shipai BSF bad BGB kila shim ruh ïa ka rai ban ïai bteng ban pynlong ïa kum kine ki jingïalang ha ki sngi ban wan, khnang ba kan don ka rukom treikam kaba janai ha ki thaiñ khappud jong kine ki artylli ki ri.
