Nongpoh, Risaw 10: Ha ka jingleit ontep bad leh burom khatduh ïa u Bah Kynsainhunlang Nengnong, uba dei u General Secretary ka RBYF sengkmie, u Bah Bipul Thangkhiew kum u President ba rangbah ka Seng RBYF haba ai jingkren ha kane ka sngi um lah shisha khlem da ïam rangbah bad jaw ki ummat halor ka jingduh noh ïa une u nongïalam ka seng.
Ïa kane ka jingleh niam bad leh burom khatduh ïa u Kynsaihunlang Nengnong kum u General Secretary ka RBYF bad uba dei ruh u Secretary ka Umroi Dorbar Pyllun la pynlong ha ka ïingsah jong u ha Umroi Madan bad da ki hajar ngut ki paidbah ki la tuid sha kane ka jingleh burom khatduh bad bun ruh na ki paidbah ki la jaw ki ummat haba kren halor ka jingïaid lynti jong une u samla kum u nongïalam ha ka them Ri Bhoi.
Ha kane ka jingleh burom khaduh la shim bynta ruh naduh u President ba rangbah ka RBYF u Bah Bipul Thangkhiew, ki nongïalam na ki zone, circle bad Unit bad kynthup ruh kiwei kiwei ki nongïalam seng kiba la wan ban sngewlem ha kane ka jingleh burom khaduh ïa u Bah Kynsaihunlang Nengnong, uba ïa ka kyrdan kum u General Secretary ka RBYF.
Nalor ka jingleh burom ïa ka met ba dang sah jong u, la pynlong ruh ïa ka leh niam ka leh rukom da ka Balang ba la pynïaid da u Rev. V. Trang uba dei u Pastor Incharge ka Mawbuh Pastorate, ha kaba la mih ki kyntien sngewlem naduh ka Balang, ka Shnong, ka Umroi Dorbar Pyllun bad kynthup ruh ki nongïalam seng bad khamtam ka seng RBYF.
Kumba la ai jingkren naduh ka Balang, ka Shnong Umroi Madan, ka Umroi Dorbar pyllun, ki nongïalam seng bad kynthup da u President ba rangbah ka RBYF u Bah Bipul Thangkhiew, ki la pynpaw ba ka jingkhlad noh une u nongïalam ka la long shisha ka jingduhnong kaba khraw, namra kum u nongïalam u don shisha ïa kata ka kyrdan nongïalam bad ka jingkitkhlieh na ka bynta ki paidbah.
Na ka liang u Bah Bipul Thangkhiew u la ai ruh ka jingkular ïa ka ïa ka sem bad ki khun ki kti jong u Bah Kynsaihunlang Nengnong ba kin don ryngkat ban kyrshan ha kaba wat la um don shuh ha kane ka sla pyrthei, hynrei kum ka seng kan kyrshan bad kan ïai don lang ha kano kano ka khep kaba ki donkam ïa k seng.
