Iam bad syier wat ban leit trei ba byrngem u BMC SSA ïa ki nongtrei, tuklar ka FKJGP, dawa wengkam mardor na Ri-Bhoi

Shillong, Nailar 31 : Hadien ka jingioh jingujor halor ka jingleh donbor jong u Block Mission Co-ordinator ka SSA, Umling BRC, Ri-Bhoi District, u ba ju byrngem ïaki nongtrei da ki ktien kiba khor, haduh ba kawei ka longkmie kala hap ban shu iam lem bad 2 ngut kiwei pat kila syier wat ban leit trei, ka seng Federation of Khasi Jaintia and Garo People (FKJGP) North Khasi Hills District hynnin ka sngi kala leit syndon sha ophis u BMC kaba don ha Nongpoh ban ïakynduh ïa u bad ban kren halor katei ka jingjia bad dawa ba u dei ban pan map mardor na katei ka longkmie kaba la shu ïam haba pyntip sha ka seng.
U tei u BMC ka SSA, Umling BRC Ri-Bhoi District u dei bala tip kyrteng kum u PP Yadav bad haka jingleit tuklar jong ka seng FKJGP hapoh ka jingïalam u samla Shanlang Diengdoh, General Secretary bad u Bah Gabriel Sun, Education Secretary ka FKJGP ha Ri Bhoi, kila dawa ba utei u ophisar u dei ban panmap da ka ktien bad kumjuh ruh da ka shithi bad naka liang jong u, u la kubur bad kohnguh ban leh ïakata.
Haba kren sha ki lad pathai khubor naka liang u Samla Shanlang Diengdoh General Secretary ka seng FKJGP u la ong ba kum ka seng kala ioh jingtip ba une u BMC u ju pynsngewsih ïaki nongtrei da kaba byrngem ïaki ha bun rukom bad don ruh haduh 3 ngut ki nongtrei kiba dei ki nongtrei kynthei kila sheptieng pynban wat ban leit trei biang hadien ba kila poi sha iing bad ka dei ka jingshisha ym tang kitei ki 3 ngut kiba ju shah byrngem hynrei hadien ba ka seng kala leit ban wad bñiah la lap ba baroh ki nongtrei ki kubur ïa katei ka jingleh jong utei u BMC.
Haka jingïakren bad ka seng utei u PP Yadav u la kubur ïaka jingleh jong u bad ai ruh da ka shithi pan map bad naka liang ka seng kala byrngem ruh ba um dei ban mlien ban pyndik lane byrngem ïaki nongtrei nangne shakhmat.
Shuh shuh naka liang ka seng kala ioh jingtip ruh ba utei u ophisar u shait bam pisa wat naki skul da kaba kular ban ai skhim ban pynheh ïaki kamra klas, ban pynbha ïaki building skul, ban shna paiñkhana bad kiwei kiwei bad buh jingkylli ruh kumno ban ioh ïa kita ki skhim hap ban siew pisa sha uta u BMC nalor ba ka pule puthi kala hiar lypa, bad bun naki skul ha Ri-Bhoi ki don hapdeng ka jingeh ba bun naka jingbym biang ki skul building bad kane kala nang pynduh mynsiem ïaki bor pynïaid skul.
Ka seng kala kynnoh ruh ba utei u ophisar u dei u la ju don dak sniew sha kiwei kiwei ki jaka bad u dei u ba la shah pynkynriah kam nakiba bun jaka namar katei ka juh ka kam kaba u leh bad dei ha kane ka kynti u la wan ban leh biang ha Nongpoh bad man ka jaka ba u leit u leh kumtei namar u dei u briew u ba ju mlien ban leh kumta.
Namarkata naka liang ka seng kala dawa ïa ki bor ba dei peit ba dei ban pynkynriah noh mardor bad um dei shuh ban don ha Ri-Bhoi bad naka liang ka seng kan sa ai ruh da ka jingthoh sha ki MLA ka Ri-Bhoi bad ban leit kynduh ruh ïaki bor ba dei peit ban wanrah pat da uwei u ba lah ban trei bha ïaka kam.