Ïalam lang ki Pulit ïa ki VDP ban talasi kali ha Quinine, ïoh lum kuna kumba 5 lak

Nongpoh, Risaw 17: Ka jingbteng jong ki pulit ka Ri-Bhoi ban talasi naphang ïa ki kali kiba ïaid ha surok bah National Highway-6 khamtam ban tehlakam ïa ki nongdih buaid bad ki nongpynkheiñ aiñ, ka la wanrah ka jingseisoh hadien ba ki paidbah ki la sdang ban bud ryntih, watla ki dang don katto katne kiba ngat haka kuna ki pulit, namar ka khubor ka pur sted mar sien don ki pulit ha surok, ki paidbah kim nud shuh ban leh tam kaba la wanrah ruh ka jinghiar arsut ki jingjia aksiden, ym kum ki bnai bala dep.
Na ka liang ki pulit ka Ri-Bhoi haka miet jong ka 16 tarik Risaw hapoh ka jingïalam u Senior Superintendent of Police ka Ri-Bhoi u VS Rathore lem bad u Bah Orville Massar Additional SP, ryngkat ka kynhun ki pulit ka Nongpoh Traffic ki la mih biang sha surok ban leit pat sa sha ka thaiñ Quinine ban talasi ïa ki kali pynkheiñ aiñ bad kaba kham sngewtynnad ha kane ka jingtalasi ka long ba wat ki VDP na ka shnong Quinine ki la mih lang ban talasi ïa ki kali kum ka jingsnohkti lang bad ka jingkyrshan ïa ka kam ba radbah bala sdang da ki pulit ka Ri-Bhoi.
Ha kane ka jingtalasi ki pulit ki la ïoh ban daiñ kuna ïa kiba dih buaid, kiba pyndait ïa ki light LED kiba ktah ïa ki nongleit nongwan ha surok, kiba ïeng bad ïaid beaiñ na ka jaka bym dei bad kumta ter ter bad ka kuna ka por kumba 2 lakh tam bad 5 lakh haba kheiñ kyllum ha baroh kawei ka district namar katei ka jingtalasi ym shym la leh tang shi jaka hynrei ha kylleng ki jaka ka Ri-Bhoi.
Haba kren sha ki lad pathai khubor na ka liang u Senior Superintendent of Police ka Ri-Bhoi u VS Rathore u la ong ba ka long kaba sngewtynnad hadien ba ki VDP ki la snohkti lang ha katei ka sienjam bala shim da ki pulit, kumba ki pulit ki don ka thong ban pynkhlaiñ ïa ki VDP ha man ki shnong ban tehlakam ïa ki kam sniew kam smeh khamtam ka jingshah ban beiñ bad shah pyniap dusmon ki heprit ha kine ki khyndiat bnai bad khyndiat taïew bala leit.
U la ong ruh ba bun na ki paidbah ki la sdang ban kylli bad wad jingtip tang shu poi ka por janmiet la ki pulit ki talasi kali ne em bad kane ka dei ka khubor ba bha ba kum ki paidbah ki la sdang ban long adkar ban leh nym kulmar haba ñiah kali khamtam ka jingdih buaid kaba wanrah shibun ki jingjia ba sngewsih, namar ka jingmih surok ki pulit ban talasi kali kam dei ka jingpynthud ïa ki paidbah ba leit ba wan hynrei ka dei ka jinghikai ba ki paidbah ki dei ban sngewthuh, bad kaba kham sngewtynnad ka long ba ka jingjia aksiden ha Ri-Bhoi District ka la hiar arsut ym kum haki khyndiat bnai bala leit.
Ha kawei pat ka liang u SSP ka Ri-Bhoi u la ong ruh ba kum ki pulit ophisar ki la ïoh shibun ki jingïaroh haki rynsan social media na ki paidbah hynrei ki don ruh ki nongtrei ba sha lyndet naduh ki pulit langrut kiba ieng bad miet bad sngi ha surok kiba long ki hero ban ïarap ïa ki ophisar namar lada khlem maki kane ka thong kam urlong kumta ki ruh ki donkam ban ïoh ka jingïaroh, u la bynrap.
Ki VDP ka shnong Quinine ki la pynpaw ka jingsngewkmen kaba khraw ïa ka sienjam bala shim da ki pulit Ri-Bhoi hapoh ka jingïalam u SSP namar bun ki jingjia aksiden, ki ba lam sha ka jingjia ba sngewsih ki dei hi namar ka jingñiah thurmur ïa ki kali khamtam ka jingdih buaid haka por ba ñiah kali bad kum ki VDP kin dang peitngor ruh hala ki shnong ki thaw ban tehlakam ïa ki kam sniew kam smeh kiba la sdang ban kharoi ha kane ka jylla jong ngi khnang ba ki paidbah sa shisien kin ïoh ban imsuk im saiñ khlem kano kano ka jingsyier.