Shillong, Lber, 01: U Director General of Police (DGP) ka Jylla u Dr. L.R Bishnoi ha ka sngi Balang u la ïakynduh ïa u Lat ka Jylla u Phagu Chauhan ha Raj Bhavan, Shillong bad pyntip ha u ha kaba ïadei bad ka shongsuk shongsaiñ ha kane ka jylla Meghalaya U Dr. Bishnoi u la pyntip ruh ha u Lat ha kaba ïadei bad ki lad ki lynti kiba ka tnat Pulit ka la shim ban tem ïa ka shongsuk shongsaiñ hapoh ka Jylla.
Ha kane kajuh ka sngi, u State Chief Information Commission u Bah H. Nongpluh, IPS (Retd.) u la leit jngoh ïa u Lat bad kumjuh ruh ka Inspector General of Police (IGP) jong ki Pulit Central Reserve Police Force, North East Sector ka Sonal V. Misra, IPS ka la leit ban ïakynduh ïa u Lat ha ing sah jong u ha Raj Bhavan, Shillong.
Ka IGP ka la pyntip ha u Lat ha kaba ïadei bad ka jingdon jong ki Pulit CRPF ha North East India ïathuh bniah ruh ïa ka jingdon jong ka pyrton Pulit CRPF ha Meghalaya.
Haba pyntip shaphang ka kamram jong ka tnat CRPF ban ïarap ïa ka Sorkar ha kaba pynneh ïa ka shongsuk shongsaiñ bad ban tem ïa kino kino ki kam runar ruser, ka Misra ka la ïathuh ruh ba ka tnat Pulit CRPF ka ju pynïajan bad ki paidbah da kaba pynlong ïa ki prokram kiba bapher bapher.
