New Delhi Rymphang 14: Ha ka 10 tarik Rymphang 2025, u Myntri Rangbah duh Narendra Modi u la ïakren bad ki samla pule ha Sunder Nursery, New Delhi, ha ka episode ba nyngkong jong ka bynta kaba 8 jong ka Pariksha Pe Charcha (PPC). Ha kane ka jingïalang, u Myntri Rangbah duh u la ïakren bad ki samla pule na kylleng ka ri, bad ïamir jingmut halor ki phang bapher bapher. Ki 36 ngut ki samla pule ki la ïoh jinghikai ba kongsan na u Myntri Rangbah duh halor ka bam kaba tei bad ka koit ka khiah; ka jinglait na ka jingkhuslai, ka jingbuh thong ïalade, ka sap ban long nongïalam, ym tang ha ki kot – ka jingkiew kaba 360º; ka jinglap ïa ki bynta kiba bha bad kiwei kiwei. Kane ka jingïakren ka la ai mynsiem bad ai jingmut ïa ki samla pule bad halor ki rukom pynbeit ïa ki jingeh ha ka jingpule da ka jingskhem jingmut bad ka rukom pyrkhat kaba ïar.
Ha ka bynta kaba lai ba la pyni mynta ka sngi, u Gaurav Chaudhary, ba ju tip ruh kum u Technical Guruji, bad ka Radhika Gupta, MD & CEO jong ka Edelweiss Mutual Fund, ki la wanrah hakhmat ki samla pule ïa ki bynta ba kongsan jong ka Artificial Intelligence bad Machine Learning. Ki la peit bniah ïa ki application jong ka Chat GPT bad ki lad pynmih dur da ka AI. U Technical Guruji u la ai jingmut ïa ki samla pule shaphang ka jingpyndonkam ïa ka teknoloji, ha kaba u la pynthikna ba ka long ka bor ba khraw jong ki ha ka jaka ban long ka jingpynwit ïa ka jingpule jong ki.
U la kren shaphang ki jingmyntoi jong ki smart study app, ki digital note, bad ki rynsan ïoh jinghikai online, kaba ïarap ïa ki samla pule ban pynïasoh ïa ka teknoloji bad ka jingpule jong ki. U la ai jingmut ïa ki samla pule ban pyndonkam ïa ka AI kum ka atiar yn ban shaniah pura ha ka bad pynshlur ïa ki ban pdiang ïa ki jingshem ba shisha ha ka jingim palat ïa ka teknoloji.
Ka Radhika Gupta ka la ban jur halor ka jingkiew ka jingkongsan ka AI, Data Science, bad Coding. Ka la batai kumno ka bynta jong ka teknoloji kan bteng ban ïar, bad long kaba kongsan ïa ki samla pule ban sngewthuh bad pyndonkam ïa ka ha ka rukom kaba dei. Haba jubab ïa ka jingkylli jong ki samla pule, ka la batai kumno lah ban pynïasohlang ïa ka AI ha ki jingïamir jingmut ha ki kamra pule ban kham pynsngewtynnad ïa ka jingpule. Ka la ban jur ïa ka jingkongsan ban pyndonkam ïa ka teknoloji kum ka atiar, pynthikna ba ka ai jingshakri ïa ki yn ban pynïaid ïa ki.
Ki samla pule na Doha, Qatar, bad Kuwait ruh ki la buh jingkylli shaphang ki AI application bad ka jingktah jong ki. Ki nongïashim bynta ki la ïadon bynta ruh ha ka jingïalehkai kaba ïadei bad ka AI ban ai jinghikai ïa ki samla pule ïa ki buit jong ka Prompt Engineering. Ki la shna ïa ka dur na ka AI jong u President barim jong ka India bad u scientist ba pawnam, Dr. APJ Abdul Kalam.
Ki la pynpaw ka jingsngewnguh ïa u Myntri Rangbah duh Narendra Modi na ka bynta ka jingwanrah ïa ka prokram kum ka Pariksha Pe Charcha, kaba ai mynsiem ïa ki samla pule ban pdiang ïa ka teknoloji na ka bynta ka jingkiew shaphrang jong ki. Ki la kren ruh shaphang ka kot jong u Myntri Rangbah duh, The Exam Warrior, kaba don ki jingai jingmut ba kongsan ban pyndonkam ïa ka teknoloji.
Ha kaba kut jong kane ka prokram, ki samla pule ki la ïa sam ïa ki jingïoh jingmyntoi jong ki na ka prokram, kynthup ki jinghikai kum ka “shim ïa la ki jong ki rai” bad “ïaleh ban ïoh ka thiah kaba biang.”
Ka bynta ba 8 jong ka PPC ka buh ïa ka nuksa ba thymmai. Palat 5 klur ki nongïashim bynta, ka prokram mynta u snem ka pyni ïa ka kyrdan jong ka kum ka Jan Andolan, ai mynsiem ïa ka jingrakhe ïa ka jingïoh jingnang jingstad. Ha ka bynta bad u Myntri Rangbah duh, 36 ngut ki samla pule na baroh ki Jylla bad UT kidei kiba la jied na ki skul sorkar Jylla/UT, Kendriya Vidyalaya, Sainik School, Eklavya Model Residential School, CBSE bad Navodaya Vidyalaya.
Ka Pariksha Pe Charcha 2025 kan don sa san tylli ki bynta, ki ban ïadon lang ki riewpawkhmat na ki bynta bapher bapher ban ai jingmut ïa ki samla pule halor ki bynta ba kongsan jong ka jingim bad ka jingïoh jinghikai. Man ka bynta kin don ki phangpdeng ba kongsan. Ha ka 12 tarik Rymphang 2025 ka actor ba pawnam, Deepika Padukone ka la ïakren bad kumba 60 ngut ki samla pule ha ka bynta kaba ar jong ka episode ba 8 jong ka Pariksha Pe Charcha. Ka Deepika ka la ïasam shaphang kumno ka jingweng ïa ki jingeh ba ïadei bad ka koit ka khiah ha ka bor pyrkhat ka lah ban pynkupbor bad ka la kren shaphang ki jinghikai ba kongsan ba ka ïoh na la ki jong ki jingïakhun.
