Khliehriat, Risaw 03: Ka jingïalehkai phutbol 1st Division bala pynïaid da ka East Jaiñtia Hills District Football Association (EJHDFA) kaba la long hynne ka sngi Hat Majai ha madan Deinchynrum, Khliehriat.
Haba phai sha ka jingïakhun kaba nyngkong, hapdeng ka Pamra Paithlu SC pyrshah ïa ka Rymbai Pohskur SC, ka jingïakhun ka la jam sha kaba kut da ka jingïakhaid naba ym shym la don mano mano ba lah ban pynkhihjar (0-0 kol) kaba la bteng haduh ba kut jong ka por ba la buh.
Katba ha ka jingïakhun kaba ar kaba la long hapdeng ka Byndihati SC pyrshah ïa ka Lumputhoi SC, ka kynhun lehkai jong ka Byndihati SC ka la khur ïa ka namjop salit da shi kol.
ïa kane ka shikol na ka Byndihati SC la thep da u Kyrshan Nongtdu ha ka minit kaba 59 kaba la biang pura ïa ka kynhun ban khur ïa ka namjop.
