Nongstoiñ, Lber 19: Ka jingïoh jong ka shnong Langpih ïa ka skul Rashtriya Madhyamik Shiksha Abhiyan (RMSA) kaba la mang pisa da ka sorkar pdeng, kan la long ka jingkyrkhu kaba khraw ïa ka thaiñ baroh kawei, namar ba katei ka skul ka dei ka skul ba ka sorkar pdeng ka hap ban pynbiang ïa baroh ki jingdonkam kum ki jaka sah jong ki nonghikai bad kiwei kiwei.
U bah K.P.Pangñiang MLA barim ka Rambrai Jyrngam constituency haba ïakren bad u nongthoh khubor, u la ong ba ban ïoh ïa katei ka skul ka long kaba eh haduh katta katta, namar ka dei ka skhim kaba hap ban ïaid lyngba ïa kiba bun bah ki kyndon ba la buh da ka sorkar pdeng.
Hynrei na ka bynta ka jingmyntoi jong ki khun ki kti jong ka thaiñ, u la ïakhun da kaba tyngeh ban pynsngew sha ka sorkar ba kan pynïoh ïa katei ka skul. Namar, ka Langpih ka dei ka jaka kaba don ha khappud bad ka Assam ha kaba ka sorkar ruh ka la sngap.
U la ong ruh ba ïa katei ka skul ka sorkar pdeng ka la mang pisa haduh 1.31 klur (shi klur laiphew wei lak tyngka) bad ka jingpyntrei ka la ïaid shait shait ha kine ki sngi.
U bah Pangñiang u la ong ruh ba ha Langpih ka la don ka Raidmynsaw Upper Primary skul kaba la seng da ka Raidmynsaw la slem bah. Katei ka skul ka la shu neh hajuh la bun phew snem, hynrei dei tad haduh u snem 2013 ba katei ka Upper Primary skul ka la sdang ban kiew ha ka jingdon jong ki khynnah skul.
Hadien kata ki riew rangbah jong ka Raidmynsaw ki la I donkam ban kyntiew kyrdan sha ka Higher secondary school. Kumta, ki la pyrshang katba kot la ka bor ban kyntiew sha ka class VII, ha kaba ïa ki nonghikai la siew tulop tang da kaba noh synñiang da ki long ïng kiba don ha poh ka Raid. U la ong ruh ba hadien katto katne snem la plie noh haduh ka klass X.
Nalorkata u la ong ba ka jingïoh sa ïa katei ka RMSA skul, ka la long ka jingkyrkhu kaba khraw namar ba katba nang mih ki snem, ka jing roi briew ka nang kiew bad wat ki Nepali kiba shong ha katei ka thaiñ ruh, ha kine ki sngi ki la sngewthuh ba ka skul ka dei kaba donkam haduh katta katta, ki la ïabeh ban phah skul ïa ki khun.
Kumta ka jingdon jong ktei ki ar tylli ki skul ka la long ka jingmyntoi kaba khraw ïa ki nongshong shnong ka thaiñ baroh kawei.
