Nongpoh, Nailar, 22: Ban tip kham bha ïa ka jingpyntreikam ïa ka 132 KV Power Station, ba ki paidbah ki la angnud ban ïoh ïa ka bording ilektrik kaba thikna ha ka thaiñ Nongpoh, ka Hynniew Trep National Youth Front (HNYF) Nongpoh Circle ha ka jingïalam u Bah Donroi Kshiar kum u Adviser lem ba ki dkhot mynta ka sngi ki la leit ban jurip ïa ka jingpyntreikam ïa ka 132 KV Power Station kaba ki dang pyntreikam mynta ha Umlyngkdait ha ka thaiñ Nongpoh.
Ha kane ka jingleit jurip nalor kitei ki nongïalam ka HNYF na Nongpoh circle ba la don ryngkat naduh u Samla Birbor Khongbeh kum u Secretary, Ronald Tangsang Finance Secretary, u Banker Warbah Sport Secretary lem bad kiwei la don ryngkat ruh u SDO ka tnad MeECL na Nongpoh Sub Division.
Kane ka jngleit jurip ka seng HNYF Nongpoh Circle ïa katei ka jingpyntrei ïa ka 132 KV power Station ka long shi bynta ban tip haduh katno ka kam ka la ïaid bad kum ka seng ruh ka sngewkhia ba ka jingthud bording ha ka thaiñ Nongpoh ka la ktah shisha ïa ki paidbah kumba la sakhi haduh kine ki sngi ba ki paidbah kim ju ïoh thikna ïa ka bording Ilektrik.
Haba kren shad ki lad pathai khubor, u Bah Donroi Kshiar u la ong ba ka jingduh bording ilektrik ha ka thaiñ Nongpoh ka la ktah shisha ïa ki paidbah bad ïa kane ka jingshah ktah ki paidbah la sakhi na ka por sha ka por ba kam ju don satia kata ka bording ba thikna ba ki paidbah ki lah ban pyndonkam kumba ki donkam ha jan baroh ki jaid kam.
U la ong ruh ba ka seng ha ki snem ba la leit noh ka la ju shim khia halor kane ka mat bad la bunsien ba ka seng ka la leit kynduh wat ïa ki Myntri ba dei peit ïa ka tnad bording ilektrik bad kumjuh ruh ki ophisar, hynrei kane ka jingshah ktah na ka jinglip bording ba khah kham ym shym la lah satia ban weng haduh kine ki sngi.
U la bynrap ruh da kaba ong, ba kane ka jingïoh ban wan rah noh da ka 132 KV Power Station kan sa long ka jingkyrkhu ïa ki paidbah lada lah ban pyndep noh kham kloi bad ka jingdon kane ka jaka sam bording kan ïarap ruh ban weng na ka jinglip bording ba khah khah ba ki paidbah ka thaiñ Nongpoh ki ïa kynduh ha ki snem ba la leit noh.
Shuh shuh, u la ong ruh kumba ka seng ka la wan ban jurip ïa kane ka jingpynteikam ïa ka 132 KV Power Station, ka seng ka khmih lynti ruh ba sorkar bad ka tnad MeECL kan pyndep noh kham kloi bad ka jingangnud ka seng ka long ban weng noh ïa ka jingeh ki paidbah kiba ju ïa kynduh na ka jinglip bording ba khah khah ha ki shnong ba hap ha ka thaiñ Nongpoh, u la bynrap.
