Ïaid beit ka Public Hearing ka M/s Green Valley Industries Ltd ha Brichyrnot, kynnoh ka KSU ba shu leh sopsop ka MSPCB
Khliehriat, Nailar, 25: Ka Public Hearing jong ka company dewbilat, ka M/s Green Valliey Industries Ltd ba la pynlong mynta ka sngi ha shnong Brichyrnot, elaka Narpuh, ka la iaid beit khlem kano kano ka jingthut, ha kane ka sngi la ïa don lang u ADC jong ka East Jaiñtia Hills District, u bah G.Warjri, uba mihkhmat na ka ophis u Deputy Commissioner, ki heh na ka tnat Meghalaya State Pollution Control Board, lem bad ki paidbah.
Na ka liang u Wahehshnong Brichyrnot, u bah Stanly Masar, u la ong ba na ka liang ka shnong ba na ki nongshong shnong hi kim don kano kano ka jingpyrshah ïa kane ka public hearing bad 100 na ka 100 ki ai ka jingkyshan, u la ong ruh ba na ka liang ki shnong ba marjan kum na ka shnong Khaddum, u la shnong Pandare, shnong Lumshnong bad shnong Tongseng ruh kine baroh ruh kim don kano kano ka jingpyrshah bad ki ruh ki ai ka jingkyrshan ïa kane ka public hearing jong ka Green Valliey Industries Ltd, u la pynpaw ka jingsngew kmen halor ka jingia don bynta lang kine ki shnong ba marjan bad kumjuh ruh ki sengbhalang ha kane ka public hearing.
U Assistant Vice President jong ka M/s Green Valliey Industries Ltd, lane ka Max cement, u Pawan Kumar Joshi, u la pynshai ba mynta ka sngi la lah ban pynlong ïa ka public hearing halor ka wei ka jaka tih khyndew kaba don ha shnong Brichyrnot kaba heh 4.77 hecter, u la pynpaw ka jingsngew nguh bad sngew kmen halor ka jingkyrshan lang ki shnong ki thaw ïa kane ka public hearing bad u la kular ruh ba un shim khia ban kyntiew lem ïa ki ruh ha ki sngi ki ban wan, khamtam ha ka lad iohkam iohjam, ha kaba shna ïa ki surok, ki lynti syngkien, ha kaba kyntiew lem ïa ka imlang ka sahlang bad kiwei kiwei, u la ai khublei ruh ïa baroh ki nongshong shnong jong ka elaka Narpuh kiba la ai ka jingkyrshan bad ka jinglam lynti, kum u Doloi jong ka Narpuh bad ki riew rangbah jong ka elaka kiba ju lam lynti bad ai ka jing kyrshan.
Ha katei ka public hearing la ioh ruh ban pynsngew paidbah ïa ka jingthmu jong ka M/s Green Valliey Industries Ltd, lane ka Max cement, ha kaba iadei bad ka jingthmu ban tih khyndew na kawei ka jaka kaba heh 4.77 hecter, kaba don ha shnong Brichyrnot, ha kane ka public hearing ym shym la don kano kano ka jingpyrshah na ka liang ki paidbah kiba la wan sha kane ka public hearing.
U President jong ka Khasi Students Unin Narpuh Circle, u bah K.S.Suchiang, u la pynpaw ka jingsngew khia halor ka jingbym ioh ban don lang ha ka public hearing jong ka M/s Green Valliey industries Ltd ba la pynlong ha shnong Brichyrnot mynta ka sngi, namar ba ïa kane ka public hearing la pynlong kloi ha ka por 10 baje ym katkum ka por ba la pynbna ban long 11 baje.
“Mynne ngi ki dkhot ka KSU Narpuh, ngi poi ha Brichyrnot ha ka por kumba 11:00 baje mynstep, ngi leit sha pandal, ngi iohi ba ki paidbah ki la ïa pra bad ïa lum ha surok, haba poi ha pandal don tang ki shuki ki briew kim don shuh. Haba pyrshang ban kylli na ki briew, ki ong ba ka Public Hearing ka la dep kut bad la sdang ïa kane public hearing ha ka por 10:00 baje mynstep,” la ong u Bah KS Suchiang
“Ngi sngew lyngngoh ïa kane. Kumno kane ka lah ban long haba ka jingpynbna ka long da kumwei ha ka jingialang pat da kumwei. Kum ka seng ngi suba jur ba ka Meghalaya State Pollution Control Board (MSPCB) bad ka Sorkar ki don ka jingleh lyndet bad ngim lah ban pdaing ïa kane bad ngi ioh jingtip ruh ba ïa kane ka public hearing ym shym la pynlong hapoh ingdara hynrei la pynlong ha Community Hall,” u la bynrap.
“Na ka liang jong ka seng ngi kren shai ba ngim lah ban pdiang ïa kane ka public hearing haduh kat ban tih ïa ka khyndew na ka jaka kaba heh hato lah mo ba ka Sorkar bad ka MSPCB kin shu leh sopsop. Kane ka don eiei sha lyndet,” la kynthoh u Bah Suchiang.
“Kum ban shu pyn-kynmaw, ha ka jingpynbna (notification) ngi iohi ba la pynbna ba ka public hearing kan sdang ha ka por 11:00 baje. Ngi la ioh jingtip pat ba ka sdang ha ka por 10:00 baje, kumno kane ka lah ban long” ong u Bah Suchiang.