Nongpoh, Nohprah 13: Ka Bhoirymbong C&RD Block ryngkat ki tnad treikam sorkar bapher bapher mynta ka sngi ki la bteng ban ai ka jingpynshai sha ki paidbah halor ka thong jong ka Vikasit Bharat Sankalp Yatra kaba dei kawei na ka thong jong ka sorkar kmie ban wan rah jingkylla hapoh ka ri naduh u snem 2047, ba ka ri India kan sa dap 100 snem ba ka la ioh la ka jong ka jinglaitluid.
Ïa kane ka prokram ban ïalap sha ki paidbah halor ka thong ka Vikasit Bharat Sankalp Yatra la pynlong ha ïing Dorbar hall ka shnong Thadnongïaw, ha kaba ki paidbah nongshnong shnong na ki shnong bapher bapher ba hap hapoh katei ka thaiñ ki la wan ban shim bynta ban sngap ïa ki lad ai jinghikai ban pynshai halor ka thong katei ka Vikasit Bharat.
Nalor ki paidbah nongshong shnong kiba la wan ban shim bynta ha kane ka prokram ai jinghikai, la don ryngkat ruh naduh ki rangbah shnong, ki nongïalam shnong bad kynthup ruh ki ophisar na ki tnad treikam sorkar bapher bapher ki la wan ban pynshai halor shibun ki lad ioh jingmyntoi na ka sorkar.
Ka jingthmu ba hakhmat eh jong kane ka Vikasit Bharat Sankalp Yatra, ka long ka thong jong u Myntri rangbah ka ri, u Narendra Modi, uba la wan rah ïa kane ka Vikasit Bharat, na ka bynta ban wan rah ïa kata ka jingkylla hapoh ka ri. Ka thong ka long ruh ba ka ri India ka dei ban long ka ri kaba la kiew ha baroh ki liang hadien ba ka la kynjoh sha ka 100 snem ba ka la ioh la ka jong ka jinglaitluid kata naduh u snem 1947 haduh u snem 2047.
Ha kane ka sngi, la don ryngkat ruh u Dr. Evarist Myrsing, uba dei u nongpeit pyrman ka sorkar kmie (Observer) halor ka jingpyntreikam ïa kane ka Vikasit Bharat Sankalp Yatra bad na ka liang une u nongpeit pyrman ka sorkar kmie, u la ai jingïaroh ïa ki ophisar sorkar bapher bapher ryngkat ka Bhoirymbong C&RD Block kiba la pynlong ïa kane ka jingai jinghikai sha ki paidbah ba kin dup sngewthuh halor shibun ki hok ba ki dei ban ioh jingmyntoi na ki skhim sorkar bapher bapher.
Shuh shuh, ha kane ka sngi u la ai mynsiem ruh ïa ki paidbah nongshnong shnong ba kim dei ban sheptieng ïa ka la hok bad kum ki nongshong shnong ki dei ban mih shakhmat ban wad ïa kita ki lad ai jingïarap ka sorkar na ka bynta ki paidbah bad ka sorkar kmie ruh ka la wan shibun ki kam pynroi ba ka thong jongka ka long ban wan rah kata ka jingkylla hapoh ka jylla bad ka ri bad khamtam ba ka ri India ka dei ban long kata ka ri kaba la kiew bha ha ka pyrthei hadien jong u snem 2047 kumba la buh thong da ka sorkar kmie.
