Ïa shitrhem ki samla Khasi ha ka 3rd Barrister Pakem Memorial Sports Meet ka KSU RIST-USTM Unit ha USTM

Nongpoh, Lber 14: Da ka jingpynlong ïa ka 3rd Prof. Barrister Pakem Memorial Sports Meet 2025, lane ka lympung ïalehkai sport ba shi sngi ba la pynlong da ka KSU RIST-USTM Unit ha ka skulbah USTM kaba long ruh shi bynta ban ai burom ïa u Prof. Barrisr Pakem halor ki synñiang kiba u la kyntiew ïa ka jingnang jignstad, ka mynsiem jong ka jingïatylli ka la paw hapdeng ki para samla khasi kiba pule da kaba ki la shim bynta shitrhem ha katei ka lympung ïalehkai sport ki samla pule.
Da ki spah ngut ki samla Khasi kiba pule ha kane ka skulbah USTM ha Ri Bhoi, ki la wan ban shim bynta ha ki jingïalehkai bapher bapher naduh ka jingïakop tan tylli, mareh, Mawpoin, Futsal lem bad shibun kiwei pat ki jait jingïalehkai.
Ïa kane ka lympung ïalehkai sport ki samla pule ha USTM la wan ban plie pyrda ha ka por mynstep da u u Samla Johny Nongrum, Sports & Cultural Secretary ka KSU NKHD bad ha ka por janmiet la pynhap pyrda da u Shelkitbok Kharbani, Asst Education Secretary ka KSU sengkmie kum u kongsan bad u Samla Samla Ferdynald K.Kharkamni- President KSU NKHD Unit kum u symbut kongsan.
Ki nongïalam ka KSU, kiba kynthup ïa u samla Shelkitbok Kharbani, Asst Education Secretary ka KSU sengkmie, u Samla Ferdynald Kharkamni bad u Samla Johnny Nongrum, kum kita ki nongïalam ki la ai jingkren ha kane ka sngi ban ai mynsiem ïa kine ki samla Khasi ba pule ha katei ka skulbah USTM kiba la ai burom ïa u Prof. Barrister Pakem bad ruh ka dak ban wan rah ïa ka jingïatylli hapdeng ki Samla Khasi kiba pule ha katei ka skulbah.
Ha kane ka sngi, kitei ki nongïalam ka KSU ki la pynpaw ruh ba ka jingmih shakhmat ki samla pule ka KSU RIST-USTM Unit ban pynlong ïa kane ka Sports Meet, ka dei ka sienjam kaba ki phai khmat kyrpang ïa ki samla Khasi bad ruh shi bynta ban ai jinghikai ruh ïa ki samla ba kin kiar na ki jingdih basniew kiba long ki diengpyngkiang ba kin poi sha ka thong jong ka jingim.