Mawkyrwat, Risaw 06: Kum shibynta jong ka jingrakhe ïa ka Swachhata Hi Seva 2023, ka ophis jong u District Swachh Bharat Mission Gramin, South West Khasi Hills District ka la pynlong ïa ka Swachhata Run 2023 ha South West Khasi Hills District ha kaba u bah Shekborlin Shiangbai, District Co-ordinator, District Swachh Bharat Mission Gramin, South West Khasi Hills District u la kaweh lama kum ka dak jong ka jingsdang ïa ka jingmareh kaba 15 KM.
Ïa kane ka jingmareh thong la sdang na ka phyllaw ka ophis jong u Executive Engineer (EE) ka PHE, Mawkyrwat Division bad leit sha ïew Mawleiñ (shnong Jakrem) – Sakwang – Pynden sakwang bad wan phai biang sha phyllaw ophis jong ka PHE ka dei ka jaka pynkut ka jingmareh.
Ha kane ka jingmareh la wan ïashimbynta da ki nongmareh kiba dei na kylleng ki nongshong shnong jong ka South West Khasi Hills District kiba kynthup ïa ki khynnah rit, ki khynnah samla shynrang bad kynthei ba la phiah ha ki saw kynhun, kata ki nongmareh kiba dang kham khynnah shynrang bad kynthei nangta ki nongmareh kiba la kham heh shynrang bad kynthei.
Hadien ka jingmareh la sam ïa ki khusnam sha ki nongjop ha kane ka jingmareh, kata ki nongmareh kiba dang kham khynnah jong ki kynthei (Under -12 years), ïa ka nam lahduh la rah da ka Larijanai Wartde na ka shnong Sakwang, ka Kynti Mary Ramsiej na ka shnong Sakwang ka la wan ba ar, bad ka Lawansuk Kharbani na ka shnong Umoid ka la wan balai. Nangta, ki nongmareh kiba dang kham khynnah jong ki shynrang (Under -12 years), u Bankitbok Ramsiej na shnong Sakwang u la long u lahduh, u Rangkatbor Mawlong na ka shnong Pyndenumsaw u la wan ba ar, bad u Besterson Jyrwa na ka shnong Rangmaw u la wan ba lai.
Katba ki nongmareh kiba dang kham heh jong ki shynrang, u Wonderful Paliar na Pyndenkseh u la ïoh bat ïa ka kyrdan ba nyngkong, u Fronstar Lyngkhoi na Nongbah Marshillong ha ka kyrdan ba ar, bad ïa ka kyrdan ba lai pat la ïoh rah da u Iweljohn Ramsiej na ka shnong Sakwang. Katba ha ka liang jong ki kynthei pat, ka nam lahduh ka la leit sha ka Marqueenless Ramsiej na ka shnong Sakwang, ka Ibandarisha K. Wanniang na Jakrem ha kaba ar, bad ka Lyntijingkyrmen Kharjahrin na ka shnong Sakwang ka lah wan ba lai.
