Mawkyrwat, Nohprah, 20: Ka Khasi Students’ Union Mawkyrwat Circle da ka mynsiem jong ka jingsngewkhia halor ki jingeh na ka daw ka jingbun paid palat ki nongkynshew pisa hapoh ka MRB Mawkyrwat Branch ki la leit ban kynduh ïa u Regional Manager jong ka Meghalaya Rural Bank Regional Office Shillong ban pynsngew ha u halor kane ka bynta.
Ïa kane ka jingleit ban ïa kynduh la lamkhmat da u samla Pulljohn Wanniang, Chairman Consumer Protection Cell bad u samla Shining Lyngdoh, Chairman Employment & Develop-ment Cell ha ka jingsynrang lang u samla Dusterwell Lyngdoh, Finance Secretary KSU SWKHD.
Ha kane ka jingwan kynduh, ka Seng ka la buh da ka dorkhas ha kaba ïa dei bad ka jingsuki treikam na ka daw ka jingduna nongtrei bad Counter hapoh ka MRB Mawkyrwat Branch kaba la buh jingeh ïa ki paidbah kiba wan na ki shnong ba jngai kiba wan thep bad sei pisa, ka jingbun palat ki nongkynshew pisa bad ki nongïoh bynta na ki lda pynroi na ka sorkar kiba kynthup la jan baroh ki shnong ka thaiñ South West Khasi Hills District, ha kaba kane ka la nang pynkhia shuh shuh ïa ka jingsuki treikam ka branch.
Ka Seng ka la ai jingmut bad kyrpad ruh ïa ka Head Office ban kham pynbun shuh shuh ki nongtrei bad ki counter hapoh ka Mawkyrwat Branch bad ruh ban plie shuh shuh ïa ki tnad treikam hapoh ka thaiñ khnang ba ki paidbah kiba kynshew pisa ha kane ka bank kin nym ïa kynduh jingeh than.
Kane ka jingleit ïa kynduh jong ka Seng ïa ka head office ka dei hadien ka jingleit jurip jong ka seng ha MRB Mawkyrwat Branch ha ka 02/12/2022 ha kaba na ka liang ki nongtrei ka MRB Mawkyrwat Branch ki la pynsngew ïa ki jingeh ba kane ka bank ka ïa kynduh.
Namarkata, halor kane na ka liang ka head office ka la ong ba mar ïa ïoh ïa kane ka khubor ba na ka liang ka KSU Mawkyrwat Circle ka leit jurip ïa ka MBR Mawkyrwat Branch bad mar shisngi ka la phah nongtrei biang sa uwei ha katei ka tnad treikam bad ka la pynkloi ban phah rah ïa ki ATM Card, bad ka la kular ruh ban shimkhia ban buh kawei ka Machine ATM ha Mawkyrwat bad ba ynsa plie biang sa kawei ka tnad treikam ha kane ka thaiñ.
