Shillong, Naiwieng, 17: U nongïalam jong ka United Democratic Party (UDP) u Bah Bindo M. Lanong uba long ruh u Symbud Myntri Rangbah ka Jylla u la ong ba ym dei ban pynshlur ïa ki nongkhaiï ba kin kyrsum ha ka jylli jong ka saiñpyrthei.
Haba pynkynmaw ïa ki kyntien jong u Myntri Rangbah barim ka Jylla u (L) BB Lyngdoh, u Bah Lanong u la ong, “ïa ki briew kiba im ha ki kam khaii ym dei ban pynshlur ba kin rung ha ka jylli jong ka sainpyrthei, ai ba kin pynleit jingmut ban kyntiew ïa ka ïoh ka kot jong ka jylla bad ban ïarap ïa ki khnang ba ka jylla kan dup long kaba riewspah. Nga tharai ba um shym la bakla bad nga ruh nga mynjur bad u haba peit ïa ka jinglong jingman jong ka jylla mynta.”
Kane ka jingkren jong u, ka thew ïa ka jinglong jingman ba mynta jong ka saiñhima sima jong ka jylla Meghalaya.
Da kaba pynpaw ba u la ïohi bun ngut ki nongkhaiï ha ka jylla Meghalaya ba kim shym la noh synñiang eiei ha ka saiñpyrthei, u Bah Lanong u la ong, “ngim dei ban pynshlur hynrei ai ba kin pynleit jingmut tang ha ki kham khaii bad ka Sorkar ruh ka dei ban ïatreilang bad ban ïarap bad ban kyrshan lang kumba long u Bah BB Lyngdoh. Kata ka dei ka jingïoh jong nga bad nga kyrshan ruh ïa ka jingong jong u (Bah BB Lyngdoh) ba ym dei ban pynshlur ïa ki nongkhaiï ba kin rung sha ka jylli jong ka saiñpyrthei hynrei lait noh iwei ar ngut eh kiba don shisha ïa ka mynsiem, ka jingmut, ka jingthrang, ka jingkut jingmut bad ka mishon. Namarkata, tang kito ki briew kiba don ïa kane ka thong, khyndiat eh, nga lah ban ong haoid hynrei ym na ka bynta kiba bun kiba shu wan tang ban lute namarba bun na ki, ki wan tang ban lute (ïa ka Jylla).”
Haba kynthoh ïa ki rukom treikam jong ka Sorkar MDA, u Bah Lanong uba la long teng u Symbud Myntri Rangbah u la ong, katkum ka jingkheiñ antad, kan long tang 25% eiei.
“Peit kumno ka jinglong jingman ha nongbah Shillong, ka nongbah jong ka jylla, ym don mano mano ruh ba salia ban weng ïa ka jingeh jong ka dheng kali. Kane ka jingeh ka jia manla ka sngi bad nalor ba ngim don ïa ki surok suiñ (Fly Over). Peit ïa ka sor Guwahati. Leit kylleng bad phin ïohi tang hapoh shi snem ne ar snem ïa ka jingkylla jong ka Guwahati bad phin jah lynti. Nga ruh nga la jah lynti, namarba ki bun palat ki surok Fly Over kiba mih tang hapoh shi snem shiteng ne ar snem hynrei ha Shillong ngim lah wat tang ban shna ïa ka Fly Over. Kaba ar, ki surok ki dei kiba khim bad kiba la kyntur shaba palat da ki briew,” ula ong shuh shuh.
Ha kajuh ka por, u Bah Lanong u la ong ba ka jingdheng kali ka dei ka mat kaba hakhmat eh ba un shim lada ïoh bat ïa ka bor synshar.
“Lada ngi wan ha ka bor, ngin sa peit ïa kane bad ngin weng ïa ka jingeh. Kane ka dei ka mat banyngkong eh. Ngam tip, bad nga dang pyrkhat ban thaw ïa ka kynhun. Ngan sa peit ïa kane ka kam hapoh shi snem phin sa ïohi kumno ngin weng ïa ka jingeh. Kan ym shim por wat tang shi snem ruh,” u la bynrap.
