ïa ka Sorkar MDA la thaw da u Modi, u Conrad u dei tang u tyngshop: kynnoh u Dr. Mukul

By Mawphor Editor On Aug 13, 2022

Shillong, Nailar 12 : U nongïalam ka Liang Pyrshah u Dr Mukul Sangma ula kynnoh ba ïa kane ka sorkar MDA hapoh ka jingïalam ka NPP la thaw da u Myntri Rangbah duh ka ri u Narendra Modi bad kumta u Myntri Rangbah ka jylla u Conrad K Sangma u dei tyng u tyngshop ba la sieh na Delhi.
ïa kane ula kren ha ka jingïalang paidbah ban thaw ïa ka TMC Block ha Mawshynrut.
U Dr Mukul u la kynnoh “ Ha u 2018 ki nongïalam ka BJP ki la wan bad sieh ïa u Conrad Sangma kum u Myntri Rangbah bad na kata ka daw u shu long tang u tyngshop uba shah khyrwait na Delhi. Baroh ki ïa tip kumno u Amit Shah u la pynbor ïa u Conrad Sangma ban ïa pynbeit pud bad tang hapoh shibnai la ïasoi ïa ka soskular bad ka Assam. Mynta ka NPP ka ong ba kan ym ïadon bynta bad ka BJP bad kan ïakhun marwei ha ka election 2023. Kine ki seng pynpait jaidbynriew kiba na bar ki wan ban thaw ïa kane ka sorkar kaba mutlop. Ki kular lut ha ka por election hynrei ki leh aiu pat hato ki bat la ka kular? Kane ka pyni ba kane ka dei ka sorkar kaba ym lah ban shaniah da ki paidbah. Kumta khlem pep ki paidbah ka jylla kin wanrah ka jingkylla ha u snem ban wan”.
U la kynnoh shuh shuh da kaba ong ba kane ka sorkar ka dei ka sorkar ka bym lah ban ai ka jingsynshar ïa ki paidbah. “ Kane ka dei ka ri synshar paidbah kumta ngi hap ban ïa trei lang ban ïada ïa ki jaidbynriew riewlum jong ngi, ïa ka kolshor ïa ki khun ki kti bad ïa ki samla kiba long ka lawei jongka jylla bad wat ïa ka pateng ban dang wan ruh. Kane ka sorkar ka la shu lap miet ban pynlut phut ïa ka spah mariang.
U la ther ïa ka HSPDP, UDP, KHNAM da kaba ong ba kine ki ong ba kin ym ïatrei lang bad ka BJP hynrei tang hadien ka election ki la kylla jingmut bad ïatrei lang bad ka BJP ban thaw sorkar.
U Justin G Momin u la kynnoh ba une u MLA ba mynta u bah Gigur Myrthong u khlem trei ei ei ruh em namar lada ïaid sawdong ka constituency ki briew kin sa ïohi da la ki jongki khmat kaei kaba u la leh. Ha kine ki san snem u khlem leh ei ei ban pynroi ïaka constituency.