Ïa ka snam ba ïoh na uwei u briew lah ban ïarap ïa 3 ngut kiba donkam snam kyrkieh

Mawkyrwat, Jylliew, 30: Ka ophis jong u District Medical & Health Officer (DM&HO), South West Khasi Hills District ha ryngkat ka jingïatreilang bad ka ophis jong u District Sports Officer, South West Khasi Hills District ka la ïoh ba rakhe ïa ka sngi ba kyrpang jong ka jingaisnam ei ne ka Blood Donation Day 2023 ha Madan Artificial Turf, MDSA, South West Khasi Hills District.
Ha kane ka sngi la ïoh ka jingbatai ba lyngkot halor kane ka sngi ba kyrpad na ka Dr. Ainam Kharlyngdoh ha kaba ka la ong ba kane ka sngi ka dei ka sngi ba la ju rakhe ha ka 14 tarik jong u bnai Jylliew manla u snem khnang ban ai ka jinghikai ne ka awareness shaphang ka jingdonkam ban ai snam. Ka la ong shuh shuh ba balei kane ka sngi ka long kaba kongsan, namar kaba nyngkong eh ka dei ba ma ngi ngi lah ban pyllait im ïa ki briew kiba donkam snam.
Kawei pat ka long ba ïa ka snam ym lah ban shna ha kum ki karkhana bad ymdon shuh da kiwei pat ki lah ban shna snam hynrei la ïoh beit tang na ki briew kiba kloi ban ai snam. Ïa ka snam ba ïoh na iwei i briew ngi lah ban ïarap ïa 3 ngut ki briew kiba donkam ïa ka.
Shuh shuh ka la batai ruh ïa ki jingmyntoi ba lah ban ïoh haba ai snam, ha kaba ka lah ban pynduna ïa ka jingïoh stroke, ka lah ruh ban pynduna ban ïoh heart attack, da kaba ai snam ka met jong ngi kan ïarap ban pyndna shuh shuh ïa ki red bold cells kiba don ha ka snam, ka pynduna ruh ban ïoh cancer, ka pynduna ïa ka jingdon jong ka khleiñ ha ka met, ka ïarap ha ka circulation lane ban ïaid bha ka snam, ka ïarap ruh ban pynkhlaiñ ïa u dohnud (liver).
Nangta de, ka la batai ruh ba mano ba lah ban ai snam, ki briew kiba lah ki dei kiba don ka jingkoit jingkhiah kaba pura, ban don ïa ka karta kaba 18 haduh ka 65 snem karta, ban don ka jingkhia kaba 45 kg shajrong, ki dei ban don ka hemoglobin kaba ym duna ïa ka 12.5 gm/dl, kiba khlem don kano kano ka jingshah sumar hadoh ka 6 bnai, kiba don cholesterol lane khleiñ ha ka met jong ki ruh ki lah ban ai snam, kiba dih dawai BP bad lada ka BP jong ki ka biang.
Ki bym lah ban ai snam pat, ka Dr. Ainam ka la ïathuh ba kiba don ka jingpang ba ïongkhlieh, set ryndang lane don jingshit met, kiba dih dawai anti-biotics, kiba don ka jingpang ba ïa bit iwei sha iwei pat, kiba dang shu dep surgery lane shah puit, kiba dang shu dep ai tika hapoh 24 kynta, kiba ar met lane dang shu ïoh khyllung bad kiba don ki jingdro ne tattoo ha ka met kim lah ban ai snam.
Ha kane ka jingrakhe la ïashimbynta lang da ki khynnah skul, ki nonghikai bad kumjuh ruh ki nongtrei ka ophis DSO.