Bteng ka ophis ka DTBO ban pynshai ïa ka jingktah ka jingpang TB ha Ri-bhoi

Nongpoh, Jylliew, 30: Kum ka jingbteng ban ïalap pyrshah ïa ka jingpang TB hapoh Ri Bhoi District katkum ka thong jong ka National Tuberculosis Elimination Programme, ka ophis ka District Tuberculosis Officer Ri Bhoi mynta ka sngi ka la pynlong da ka jingïakynduh lang ki Rangbah Shnong shi bynta ban ai jinghikai kumno ban shim ïa ki lad ki lynti ban pynduhjaid noh ïa kane ka jingpang TB kaba dei kawei na ka jingpang ba pur sted bad kaba lah pat ban pynkoit lada dih thikna ki dawai kumba la btha da ki Doctor.
Ïa kane ka prokram ai jinghikai ban ïakhun pyrshah ïa ka jingpang TB la pynlong ha ka Umling C&RD Block ha kaba la wan ban shim bynta da ki rangbah shnong bapher bapher jong ki shnong ba hap ha kane ka Block da ka jingïatrei ryngkat ka ophis ka District Tuberculosis Officer ka Ri Bhoi bad ka ophis u Block Development Officer ka Umling C&RD Block.
Ha kane ka sngi la don ryngkat ruh naduh u Dr. M Mawrie, State TB officer, Dr. E Kalwing, District TB Ophisar ka Ri Bhoi, u Agriswar Das naka kynhun Piramal Foundation, Kong Raplang Ika Nongkling, Gram Saveka Umling C&RD Block, Kong N Tracy Kharkamni State Coordinator, FJ Diengdoh DPC, NTEP bad ki rangbah Shnong Jong ki Shnong bapher bapher.
Kumba la pynpaw da ka District Tuberculosis Officer ka Ri Bhoi ha kane ka prokram ai jinghikai, tang ha Umling C&RD Block kiba don jingpang TB ki don 90 ngut bad kane ka jingpynlong ïa kane ka prokram ai jinghikai ka long ban bteng ka jingïakhun na ka bynta ban pynduhjaid ïa baroh kiba pang TB ha ka District bad ka jylla hi baroh kawei.
Ban pynshai halor ka thong jong ka National Tuberculosis Elimination Programme sha ki Rangbah Shnong, u Dr. M Mawrie u la ïoh ban batai halor ka jingïaleh jong ka Tnad ka koit ka khiah ba ka la buh ka thong ban pynduh jaid noh ïa kane ka jingpanag TB tang haduh u snem 2025.
U Dr. Mawrie u la batai ruh ki dak ki shin jong ka jingpang TB kiba paw shabar kiba kyntup ïaka jingphuh syep ha kapor miet, ka jingjyrhoh, ka jinghiar Kilo haka met u briew bad kiwei kiwei. Ha kane ka sngi u Dr. Mawrie u la ïoh ruh ban batai ïaki lad jingïada hakaba ïadei bad ka jingpang Tuberculosis ba Kum ki nong shong Shnong ki dei banai ka jingïatrei lang na ka bynta ban pynduhjaid ïa kane ka jingpang bad u la ong ruh ba ki dei ban leit sumar wut wut sha ki jaka sumar kiba don ha jan lada don ki dak ki shin kiba paw shabar.
Shuh shuh, u Dr. Mawrie u la ïathuh ruh ba ha ka jingïakhun ban pynduh ïa kane ka jingpang ngi don kam ka jingïatrei lang naduh ki Shnong ki thaw, ki nongïalam Shnong bad ki riew shimet. U la ïathuh ba naka liang ka sorkar ka la buh ruh ka khusnam ïaki Shnong kiba la lah ban pyntikna ba kim don shuh kane ka jingpang TB hapoh ka Shnong ka jong ki bad ban ïoh ïa kane ka khusnam ki Shnong ki hap ban bud ryntieh ïaki kyndon ba la buh daka tnad jong ka koit ka khiah khnang ba kin lah ban pynshisha ba ka Shnong ka la lait naka jingdon kane ka jingpang TB, u la bynrap.