Ïa ka case u Raja bad Sonam dei ban ai beit sha ka CBI kumba dawa ki bahaïing : PT Sawkmie

Shillong, Jylliew 8 : U Bah PT Sawkmie, MLA barim u la ong ba ka jingjia ïa ki shi kurim ki nongjngohkai pyrthei kiba na Indore, Madhya Pradesh, ha kaba u lok u la iap bad ka lok pat tad haduh mynta ruh ym pat lap, ka la buh ïa ki nongpyllait im, naduh ki Rescue Team, ki pulit, ki nongshong shnong jong ka Sohra bad kiwei, kiba la mih ban ïa wad lang ba kin sah ha ka umdum.
“Haduh mynta baroh ki la ïa trei shitom ban ïa pyrshang ban ïa wad ban lap ne ïoh ïa ka met jongka Sonam, hynrei kane kam shym la urlong,” ong u bah PT Sawkmie haba kren sha u nongthoh khubor.
U la ong ruh, “Ka jylla jong ngi ka la shu shah pynbud nam sniew halor kane ka jingjia lyngba ki bahaïing hasem jong kine ki arngut, ha kaba ki la kynnoh ïa ka jylla bad ïa u Myntri rangbah ka jylla u Conrad Sangma ban ong bakim shym la leh eiei.”
“Kumba kiba haïing hasem ki la dawa ban aiti sha ka Central Bureau of Investigation (CBI) bad ki la thoh ruh sha u Myntri Rangbah duh ka Ri u Narendra Modi bad kumjuh sha u Union Home Minister, kum ka jylla nga sngew ba ngi dei ban ai ïa kaei kaba ki kwah ki bahaïing hasem, namar katne ka jylla ka la shah pynjah burom ha ka pyrthei baroh kawei,” bynrap u bah Sawkmie.
U la ong shuh shuh, “Kumba la sakhi ka sorkar ka la trei shitom ïa kane ka jingjia bad ka la ïai pyrshang na baroh ki liang, balei ngin tieng ïa kata ka CBI lada ka wan namar ngi sngewthuh ba ki bahaïing hasem kin nym pdiang ia kano kano ka enquiry ne jingtohkit.”
Kum ban shu pynkynmaw u Raja Raghuvanshi bad ka Sonam, kiba dang shu dep ïathoh ki la jah rngai haba leit jngohkai ha Sohra, ïa ka metiap u Raja la lap, hynrei ïa ka Sonam pat tad haduh mynta ym pat lap satia.