SHILLONG, Lber 16: Ka Shillong Lajong FC ka la mad ïa ka namrem da 4-0 kol ha ka Rajasthan United ha jingïalehkai ka lympung I-League, kaba la long ha Vidyadhar Nagar Stadium, Jaipur, ha ka sngi U Blei.
Kane ka dei ka jingïalehkai kaba san sien lynter jong ka Lajong shabar nala ïing, bad da kane ka namrem ka Lajong ka hiar sha ka kyrdan ba hynñiew ha ka miej ryngkat ki 26 poiñ naki 19 sien ïakhun, katba ka Rajasthan United ka la kiew sha ka kyrdan ba san da kaba tam tang 1 point ïa ka Lajong bad ïa ka Namdhari kiba bud nadien, ha kaba ka la khur 27 poiñ naki 19 sien ïakhun.
Ka Namdhari ka la ïoh ban tam hakhmat ka Lajong dei namar ba ka don ka jingïapher kol kaba kham bha, bad nalor kata, ka dang sah kawei ka jingïalehkai ha kti. Baroh arliang, ka Namdhari bad ka Lajong ki la kamai mar 26 poiñ, katba ka Lajong ka la ïalehkai kham bun sien.
Kiba la pynkhihjar na bynta ka Rajasthan United ki long u Abhash Thapa (45+2’min), Martan Raina (50’min), Seiminmang Manchong (54’min) bad u Pranjal Bhumij (76’minit).
Kumban shu pynkynmaw, ka jingïalehkai ba khatduh hapdeng kine ki arliang kaba la long ha Shillong, ka Lajong ka la pynbam kput haduh 8-0 kol, hynrei mynta ka kynti ka la shah kput kylliang ha katei ka klob kaba na Rajasthan.
