shillong, Ïaïong 06: Ka Shillong Lajong FC ka la ïakhaid khlem da lah thep kol bad ka Delhi FC ha ka jingïalehkai ba khatduh jong ka ha ka lympung I-League 2024-25 kaba la long ha madan First Ground – SSA Stadium, Polo, ha ka sngi Saitjaiñ.
Ka Delhi ka la shah rem saw sien lynter shuwa kane ka jingïalehkai ba khatduh pyrshah ïa ka Lajong. Da kaba sahkut ha trai duh jong ka miej bad ka la thikna ba kan sa shah pynhiar kyrdan, kane ka jingïalehkai ka long tang ban pyndep ïa ka samoi na bynta jong ki. Katba ka Lajong ka la shah rem lai sien bad ka la ïakhaid ha kawei na ki saw tylli ki jingïalehkai ba khatduh bad ka kyrmen ban pynkut ïa ka samoi da ka jingjop.
Ha ka por ba kine ki arliang mamla ki ïakynduh ha ka jingïakhun kaba nyngkong, ka Delhi ka la pynliem ïa ka Lajong ha u bnai Nohprah. Kaba dei ka nam rem kaba nyngkong eh jong ka Lajong ha kane ka samoi bad ka dei ruh kawei na ki lai tylli ki jingjop ba ka Delhi kan mad ha baroh shi lynter jong ka samoi ïalehkai 2024-25.
Katba ka SLFC ka la thaw bad ïoh shibun ki lad ki lynti ha ka kylla step, hynrei ka la duna pat ban pynurlong ïa ki. Ka jingpyrshang jong u Sheen Sohktung ka la leit beit beit sha u rangapkol ka Delhi, u Lalmuansanga, katba hadien katto katne minit ka jingpyrshang thep kol da ka khlieh jong u Kenstar Kharshong ka la kiar sharud.
Nangta hadien kane, ka kynhunba ïalehkai hala ïing ka la don hapdeng ka jingsyier ha ki khyndiat minit mar ïa sdang ka kylla miet, ha kaba ka Delhi ka la ïoh ïa ka penalty hynrei u Nikhil u la lah ban khanglad ïa u Akash Tirkey ban pynkhih ïa ka kol.
Hashwa ban kut ka jingïalehkai ka Lajong ka la shah pynduna sha ka 10 ngut hadien ba u Renan u la thombor ïa uwei na ki rangïalehkai ka Delhi, kaba la pynlong ïa u ban ïoh ïa ka yellow card kaba ar.
Hadien 22 tylli ki wat ïakhun, ka SLFC ka la lah ban kamai 28 point kiba ka la bynrap da ki hynñiew tylli ki namjop, ïakhaid hynñiew sien bad shah rem 8 sien naki 22 sien ïakhun.
Kumba long ha ka samoi ïalehkai 2023-24 (ba ka la kamai 31 point naki 24 sien ïalehkai), mynta ka samoi ruh ka Lajong ka pyndep ha ka kyrdan ba phra, kumta kam shym la don kano kano ka jingkiew kaba shisha, ha ka liang ka kyrdan jong ka klob.
Katba ka la don ka khubor kaba bha na ka bynta kawei pat ka klob jong ka thaiñ shatei lammihngi kaba don ha kane ka lympung, ka Aizawl kaba dei ruh ka lahduh barim. Ka la pynliem ïa ka Namdhari FC kaba don ha ka kyrdan kaba hynriew da 3-0 kol ha la ïing bad pynkut ïa ka samoi ha ka kyrdan kaba shiphew, tang ban lait na ka thup shah pynhiar kyrdan. Ki kynhun ban shah pynhiar kyrdan ki long ka SC Bengaluru bad ka Delhi.
